Kuba XİN rəhbəri Kaya Kallası ikili standartlarda ittiham edib

Kuba hakimiyyəti Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallası sərt tənqid edərək onu ölkədəki iqtisadi və enerji böhranını qiymətləndirərkən “obyektivliyin olmamasında” ittiham edib.

"PostMedia" xəbər verir ki, bu barədə AFP məlumat yayıb.

Daha əvvəl Kallas Meksikada jurnalistlərə açıqlamasında Kubadakı ağır həyat şəraitinin “onilliklər boyu davam edən səmərəsiz idarəetmə və siyasi repressiyaların nəticəsi” olduğunu bildirib.

Kuba xarici işlər naziri Bruno Rodriqez Parrilla isə Kallasın açıqlamalarını “açıq şəkildə ikili standartların göstəricisi” adlandırıb.

O bildirib ki, Kuba xalqına qarşı ABŞ tərəfindən tətbiq edilən qanunsuz və ədalətsiz blokada, neft embarqosu və hərbi təzyiq hədələri ölkədəki hazırkı çətin vəziyyətin əsas səbəbidir. Rodríguez bu fikirləri "X" sosial şəbəkəsində də paylaşıb.

Nazir əlavə edib ki, Kubanın dövlət siyasəti geniş ictimai razılığa əsaslanır və yalnız ölkənin daxili işlərinə aiddir.

O həmçinin xatırladıb ki, ABŞ Prezidenti Donald Tramp mayın 1-də Kuba ilə bağlı yeni sanksiyalar paketi imzalayıb. Bu sanksiyalar Kubada fəaliyyət göstərən xarici şirkətlərə, o cümlədən bəzi Avropa şirkətlərinə qarşı ikinci dərəcəli sanksiyalar riskini də nəzərdə tutur.

Bu kontekstdə Rodriqez Avropa rəsmilərinin niyə zərər görən Avropa şirkətləri və vətəndaşları barədə narahatlıq bildirmədiyini soruşub.

2017-ci ildə Kuba və Avropa İttifaqı arasında siyasi dialoq və iqtisadi əməkdaşlığı nəzərdə tutan saziş imzalanıb.

Ötən həftə Vaşinqton münasibətlərdə yeni gərginlik yaradaraq, Kubanın keçmiş prezidenti Raúl Kastroya qarşı 1996-cı ildən davam edən iş çərçivəsində cinayət ittihamları irəli sürüb. Havana bu addımın ABŞ tərəfindən hərbi müdaxilə üçün bəhanə kimi istifadə oluna biləcəyini xəbərdar edib.