Peskov: "Ermənistan Aİİ-ni tərk edərsə, qazın güzəştli qiyməti bazar qiymətinə çevriləcək"

Rusiya, xüsusilə tərəfdaşları üçün enerji resurslarının etibarlı təchizatçısıdır. Lakin Ermənistan Avrasiya İqtisadi İttifaqını (Aİİ) tərk etmək qərarına gələrsə, İrəvan üçün cəlbedici olan güzəştli qaz qiyməti bazar prinsipləri əsasında formalaşmağa başlaya bilər.

"PostMedia" xəbər verir ki, bu barədə brifinq zamanı Rusiya prezidentinin mətbuat katibi Dmitri Peskov xatırladıb.

“Biz Ermənistan rəhbərliyinin rus qazının, rus enerji daşıyıcılarının çox cəlbedici, hətta güzəştli qiymətə təqdim olunması ilə bağlı bəyanatlarını eşitmişik. Bu, həqiqətən də belədir. Rusiya bütün ölkələrə, xüsusilə də ən yaxın müttəfiqlərinə və tərəfdaşlarına enerji daşıyıcılarının etibarlı və məsuliyyətli təchizatçısı olaraq qalır”, — deyə Kremlin nümayəndəsi vurğulayıb.

Bununla yanaşı, Peskov qeyd edib ki, “belə bir rejim digər inteqrasiya birliklərinin iştirakçıları üçün mümkün deyil”.

“Bu, əlbəttə ki, Avropa İttifaqıdır. Burada qiymət kateqoriyası artıq tamamilə fərqlidir — bazar qiymətləridir. Bu, İrəvandakı dostlarımıza çox yaxşı məlumdur”, — deyə o yekunlaşdırıb.

Peskov “gələcək iqtisadi inteqrasiya yolunun seçilməsi məsələsini” açıq sual adlandırıb, lakin xatırladıb ki, Moskvaya səfəri zamanı Ermənistanın baş naziri Nikol Paşinyan “Ermənistanın tam həcmdə Aİİ üzvü olaraq qaldığını, eyni zamanda xarici siyasətinin digər istiqamətləri, xüsusilə də Avropa ilə münasibətlərini inkişaf etdirdiyini” bildirib.

“Və Paşinyanın o zaman izah etdiyi kimi, müəyyən mərhələdə yekun qərar qəbul etmək lazım gələcək və bu qərar referendum vasitəsilə veriləcək. Söhbət məhz erməni xalqının qərarından gedəcək”, — deyə Rusiya liderinin mətbuat katibi sözlərini yekunlaşdırıb.