SEPAH əvvəlki kimi İranın idarə olunmasında mühüm qüvvə olaraq qalır - Admiral Kuper

ABŞ Silahlı Qüvvələrinin Yaxın Şərq üzrə komandanı admiral Bred Kuper bildirib ki, İranın hərbi potensialının “kəskin şəkildə zəiflədiyini” düşünsə də, İran yalnız ritorikası ilə belə gəmiçiliyə təsir göstərə bilir.

"PostMedia" xəbər verir ki, bu barədə "Associated Press" məlumat yayıb.

“Onların səsi çox yüksəkdir və sənaye, eləcə də sığorta sektorundakı kommersiya qurumlarına yönələn təhdidlər aydın şəkildə eşidilib”, - deyə o bildirib.

Kuper həmçinin qeyd edib ki, ABŞ hərbçilərinin “fövqəladə hallar üçün geniş imkanları var və onlar gəmiləri Hörmüz boğazından müşayiət etmək qabiliyyətini qoruyub saxlayırlar”.

Bununla yanaşı, o hesab edir ki, “həssas danışıqlar dövründə” irəliləyiş əldə etməyin ən yaxşı yolu siyasətçilərdən asılıdır.

Kuper əlavə edib ki, ABŞ ordusunun İran silahlı qüvvələrinə vurduğu zərər və dağıntılara baxmayaraq, İran İslam İnqilabı Keşikçiləri Korpusu (SEPAH) əvvəlki kimi ölkənin idarə olunmasında mühüm qüvvə olaraq qalır.