İran əvvəlkindən daha zəifdir, İsrail isə daha güclüdür - Netanyahu

İsrailin Baş naziri Benyamin Netanyahu bildirib ki, Qüds “əbədi olaraq İsrailin nəzarətində qalacaq” və İranla “digər düşmənlərə” qarşı hərbi uğurları yüksək qiymətləndirib. O, bu fikirləri Qüds Gününə həsr olunmuş dövlət mərasimində səsləndirib.

"PostMedia" xəbər verir ki, bu barədə "Times of Israel" məlumat yayıb.

“İranın terror rejimi əvvəlkindən daha zəifdir, İsrail dövləti isə əvvəlkindən daha güclüdür. Biz radikal islamın hər hansı təhdidinə qarşı qətiyyətlə mübarizəni davam etdirəcəyik,” - Netanyahu deyib.

O, həmçinin iddia edib ki, əgər İsrail 2025-ci ilin iyununda və ilin əvvəlində İranın nüvə proqramına və ballistik raket layihələrinə qarşı hərbi əməliyyatlar aparmasaydı, Tehran artıq nüvə silahına sahib ola bilərdi.

“Düşmənlərimiz bizi tamamilə məhv etməyə çalışır. Onların başqa bir məqsədi də bizi Qüdsdən uzaqlaşdırmaqdır. Biz buna icazə verməyəcəyik,” — deyə o əlavə edib.

Netanyahu İran, eləcə də HƏMAS və “Hizbullah”a qarşı son əməliyyatlarda əldə olunan nəticələrdən danışıb və ABŞ Prezidenti Donald Tramp administrasiyası ilə əməkdaşlığın “indiyə qədərki ən yaxın müttəfiqlik” olduğunu vurğulayıb.