Kursk vilayətində 2 300 şimali koreyalı hərbçi həlak olub

Kursk vilayətində 2 300 şimali koreyalı hərbçi həlak olub.

"PostMedia" xəbər verir ki, bu barədə BBC məlumat yayıb.

Bu rəqəmlər rəsmi şəkildə açıqlanmasa da, məlumat yeni memorial kompleksdəki işarələrdən məlum olub. BBC peyk görüntüləri və Şimali Koreyada tikilmiş yeni memorialın rəsmi fotolarına əsaslanaraq bildirib ki, Rusiyanın Ukraynaya qarşı apardığı müharibədə Moskva tərəfində döyüşən təxminən 2 300 şimali koreyalı əsgər ölüb.

2024-cü ilin iyun ayında Şimali Koreya ilə Rusiya arasında strateji tərəfdaşlıq sazişi imzalanıb. Sənəddə tərəflərdən birinə qarşı təcavüz halında qarşılıqlı hərbi yardım müddəaları da yer alıb. İki ay sonra — avqust ayında Ukrayna gözlənilmədən sərhədyanı Kursk vilayətinə daxil olaraq Rusiyanın 1 000 kvadrat kilometrdən çox ərazisini nəzarətə götürüb.

Dövlət tərəfindən maliyyələşdirilən Koreya Müdafiə Araşdırmaları İnstitutunun keçmiş baş elmi işçisi Kim Çjin Munun sözlərinə görə, 2024-cü il sazişi Şimali Koreya hərbçilərinin ilk növbədə Kursk vilayətinə göndərilməsinin əsas səbəbi ola bilər. Onun fikrincə, bu səbəbdən şimali koreyalı qüvvələr Ukraynanın digər cəbhə bölgələrinə deyil, məhz Kursk istiqamətinə yerləşdirilib.