Avstriya üç rus diplomatını ölkədən çıxarıb

Avstriya üç rus diplomatını “persona non grata” elan edərək ölkədən çıxarıb. Qərarın səbəbi kimi diplomatik nümayəndəliklərin damında yerləşdirilən və “antenalar meşəsi” kimi xarakterizə olunan qurğular göstərilib.

"PostMedia"nın məlumatına görə, Avstriya xarici işlər naziri Beate Meinl-Reisinger bildirib ki, bu antenalar məlumat toplamaq və siqnalları ələ keçirmək üçün istifadə oluna bilər:
“Diplomatik toxunulmazlıqdan casusluq məqsədilə istifadə etmək qəbuledilməzdir”.

Məlumata görə, həmin üç diplomat artıq Viennanı tərk edib.

Daha əvvəl "Die Presse" yazmışdı ki, Vyana Moskva tərəfdən bu şəxslərin diplomatik toxunulmazlığının ləğvini tələb etsə də, bu müraciət cavabsız qalıb.

Rusiya səfirliyi isə qərarı “düşünülməmiş addım” adlandıraraq sərt cavab veriləcəyini bildirib və əlavə edib ki, münasibətlərin daha da pisləşməsinə görə məsuliyyət Vyananın üzərinə düşür.

"Financial Times" qeyd edir ki, bütün səfirliklər rabitə üçün peyk antenalarından istifadə edir, lakin rus antenalarının müxtəlif peyklərə yönəldilərək siqnallar toplaması xüsusi diqqət çəkib. Bildirilir ki, son iki ildə Qərb xüsusi xidmət orqanları bu tip qurğuların sayının artmasını izləyib.

Eyni zamanda "Falter" yazır ki, Avstriya casusluqla bağlı qanunvericiliyi sərtləşdirməyi planlaşdırır. Məqsəd ölkəni “Avropanın casusluq mərkəzi” kimi xarakterizə olunmasına səbəb olan boşluqları aradan qaldırmaqdır.

"Reuters" hesablamalarına görə, son hadisə ilə birlikdə 2020-ci ildən bəri Avstriya ümumilikdə 14 rus diplomatını ölkədən çıxarıb.