Venesuela müxalifətinin lideri tezliklə prezident seçkilərinin keçirilməsini istəyir

Venesuela müxalifətinin lideri, Nobel Sülh Mükafatının laureatı Mariya Korina Maçado Venesuelada “mümkün qədər tez” prezident seçkilərinin elan edilməsini istəyir.

"PostMedia" xəbər verir ki, bunu o, "Agence France-Presse" agentliyinə müsahibəsində deyib.

Onun sözlərinə görə, seçkilər ABŞ tərəfindən əsir götürülmüş lider Nikolas Maduronu əvəz etmək üçün keçirilməlidir.

“Venesuela Konstitusiyası çox aydındır və faktiki olaraq bildirir ki, daimi boşluq yaranarsa – cənab Nikolas Maduronun vəziyyətində isə heç kim bunun daimi boşluq olduğuna şübhə edə bilməz – seçkilər növbəti 30 gün ərzində keçirilməlidir”, – deyə Maçado bildirib.

Venesuela müxalifəti ötən həftə də prezident seçkilərinin keçirilməsinə çağırmışdı. Bu çağırış ABŞ-nin yanvarın əvvəlində Maduronu və onun həyat yoldaşını saxlayaraq ABŞ-yə aparmasından 90 gündən çox vaxt keçməsindən sonra səsləndirilib.

Venesuela Konstitusiyasına görə, “Respublika prezidentinin müvəqqəti yoxluğu 90 günə qədər hazırkı vitse-prezident tərəfindən əvəz olunur və bu müddət Milli Assambleyanın qərarı ilə daha 90 gün uzadıla bilər”.

Bununla belə, 2025-ci ilin Nobel Sülh Mükafatı laureatı olan Maçado bildirib ki, ölkəyə 12 il rəhbərlik etmiş Maduronu əvəz etmək üçün uyğun şərait yaradılmalıdır. Onun sözlərinə görə, ilk növbədə siyasi əlaqələri olmayan şəxslərdən ibarət yeni Milli Seçki Şurası təyin edilməli və seçici siyahıları yenilənməlidir.

Maçado bildirib ki, hazırda “səsvermə hüququ olan venesuelalıların 40 faizi qeydiyyatdan keçməyib”, onların arasında ölkəni tərk etmiş şəxslər də var. O, bu barədə bazar ertəsi Parisdə Emmanuel Macron ilə görüşündən sonra AFP-yə videobağlantı vasitəsilə danışarkən qeyd edib.

“Bütün bunlar vaxt tələb edir və hesab edirik ki, yeni Milli Seçki Şurası təyin edildikdən sonra bu addımların həyata keçirilməsi təxminən doqquz ay çəkəcək”, – deyə o əlavə edib.