Macarıstandakı seçkilərdə müxalifət qalib gəldi, Orban məğlubiyyəti etiraf etdi

Macarıstanda parlament seçkilərində səslərin üçdə ikisinin işlənməsindən sonra müxalif “Tisa” partiyası lider mövqedədir. Baş nazir Viktor Orban məğlubiyyəti etiraf edib.

"PostMedia" xəbər verir ki, Macarıstanın Milli Seçki Bürosunun məlumatına görə, səslərin 72,44%-i sayıldıqdan sonra Peter Maqyarın rəhbərlik etdiyi Avropayönlü və sağ-mərkəzçi “Tisa” partiyası 199 mandatdan 138-ni əldə edir.

İki üçdəlik çoxluq əldə edilməsi partiyaya Konstitusiyaya və əsas qanunlara dəyişikliklər etməyə imkan verə bilər.

Baş nazir Viktor Orbanın rəhbərlik etdiyi mühafizəkar “Fides” partiyası isə hələlik cəmi 54 mandat qazanıb. Daha 7 mandat isə ifrat sağçı “Bizim Vətənimiz” partiyasına gedə bilər.

Seçkinin nəticələri səsvermənin davam edən sayımı zamanı hələ dəyişə bilər.

Bununla yanaşı, Peter Maqyar bildirib ki, Viktor Orban artıq onu qələbə münasibətilə təbrik edib.

“Seçkilərin nəticələri hələ yekun olmasa da, aydındır və başa düşüləndir. Ölkəni idarə etmək məsuliyyəti və imkanı bizə çatmadı. Qalib gələn partiyanı təbrik edirəm”, – deyə Viktor Orban tərəfdarları qarşısında çıxışı zamanı bildirib.

O, həmçinin əlavə edib ki, “Fides” partiyası müxalifətdə olsa da, Macarıstana xidmət etməyə davam edəcək.

“Macarıstan Avropanı seçdi. Avropa həmişə Macarıstanı seçib. Ölkə öz Avropa yoluna qayıdır. İttifaq güclənir”, – Avropa Komissiyasının sədri Ursula fon der Leyen "X" hesabında yazıb.

Peter Maqyarı ilk təbrik edənlərdən biri Fransa prezidenti Emmanuel Makron olub. O, X"da yazıb: “Fransa demokratik iştirakın, Macar xalqının Avropa İttifaqı dəyərlərinə sadiqliyinin və Avropada Macarıstan üçün qələbənin qalibiyyətini alqışlayır”.

Hazırkı seçkilərdə Macarıstanda iştirak rekordu qeydə alınıb — 74,23%. 2022-ci il seçkilərində bu göstərici 62,92% idi, əvvəlki rekord isə 2002-ci ildə 73,51% olmuşdu.

Macarıstan qanunlarına əsasən, səslərin tam hesablanması ən gec 18 aprel şənbə gününə qədər başa çatdırılmalıdır.