Cənubi Koreyadan dron Şimali Koreyaya uçub

Cənubi Koreya prezidenti Li Yi-myunq Şimali Koreyanın hava məkanına pilotsuz uçuş aparatının daxil olması ilə bağlı təəssüfünü ifadə edib.

“PostMedia” xəbər verir ki, bu barədə “Xinhua” agentliyi məlumat yayıb.

Prezident hökumətin iclasında bildirib ki, bu hadisə hökumətin niyyəti olmasa da, dövlət başçısı kimi o, Pxenyan rəhbərliyinə ayrı-ayrı şəxslərin məsuliyyətsiz və düşünülməmiş hərəkətləri nəticəsində yaranmış əlavə hərbi gərginliyə görə təəssüfünü çatdırıb.

Li Yi-myunq aidiyyəti nazirliklərə sistemləri təcili şəkildə təkmilləşdirməyi və belə halların təkrar baş verməsinin qarşısını almaq üçün operativ tədbirlər görməyi tapşırıb.

O, həmçinin hadisədən ən çox narahat olan sərhədyanı bölgələrin sakinlərinə görə də dərin təəssüfünü bildirib.

Qeyd olunur ki, bu, pilotsuz uçuş aparatının Şimali Koreya ərazisinə daxil olması ilə bağlı açıqlamadan sonra Cənubi Koreya liderinin ilk rəsmi üzrxahlığıdır.

Bundan əvvəl isə ölkənin Birləşmə naziri Çunq Donq-yonq fevralın əvvəlində hökumət səviyyəsində Pxenyandan üzr istəyərək bildirib ki, dronların Şimali Koreya istiqamətində buraxılması bəzi şəxslərin icazəsiz fəaliyyəti nəticəsində baş verib.

Prezident vurğulayıb ki, Cənubi Koreya Konstitusiyası və qanunları vətəndaşların Şimali Koreyaya qarşı təxribat xarakterli hərəkətlərini qəti şəkildə qadağan edir. Onun sözlərinə görə, Koreya yarımadasında sülh və sabitlik prioritet olaraq qalmalı və qorunmalıdır.