Tramp yenidən güc tətbiq etməklə hədələyib

ABŞ Prezidenti Donald Tramp Böyük Britaniyanın baş naziri Keyr Starmerlə Dieqo Qarsiya adası ilə bağlı çox səmərəli müzakirələr apardığını açıqlayıb.

"PostMedia" xəbər verir ki, bu barədə o, sosial şəbəkələrdə yazıb.

“Bu adada ABŞ-nin Hind okeanının mərkəzində yerləşən və strateji baxımdan son dərəcə vacib olan böyük hərbi bazası var. Bu baza ABŞ-nin milli təhlükəsizliyi üçün nəhəng əhəmiyyət daşıyır.

Biz dünyanın ən güclü ordusuna sahibik. Son bir ildə hərbi əməliyyatlarımız qoşunlarımızın gücü, müasir texniki imkanlar və ən əsası, bazalarımızın strateji yerləşməsi sayəsində uğurlu olub.

Anlayıram ki, bir çoxları baş nazir Starmerin bağladığı sazişi mümkün olan ən yaxşı variant hesab edir.

Bununla belə, əgər gələcəkdə icarə müqaviləsi ləğv olunarsa və ya kimsə bazamızdakı ABŞ fəaliyyətini və qüvvələrini təhdid edərsə, hərbi təhlükəsizliyi təmin etmək və Dieqo Qarsiyada Amerika mövcudluğunu gücləndirmək hüququnu özüm üçün saxlayıram.

Hamı bilməlidir ki, mən bu qədər mühüm bazada ABŞ-ın mövcudluğunun əsassız iddialar və ya ətraf mühitlə bağlı cəfəng arqumentlər ucbatından zəiflədilməsinə və ya təhlükə altına düşməsinə heç vaxt icazə verməyəcəyəm”, – deyə Tramp bildirib.