Venesuela hökuməti çoxsaylı məhbusları dərhal azad etmək qərarı verib

Venesuela hökuməti həm ölkə vətəndaşları, həm də xarici vətəndaşlar daxil olmaqla xeyli sayda məhbusun dərhal azad ediləcəyini elan edib.

PostMedia" xəbər verir ki, bu barədə yerli KİV-lər məlumat yayıb.

“Bolivarian hökumətinin bu jesti sülhə töhfədir. Respublikamızda dinc həyatı təmin etmək və onun rifahına nail olmaq üçün hamımız bu töhfəni verməliyik”, — deyə Rodriges bildirib.

Xatırladaq ki, yanvarın 3-də ABŞ Venesuela ərazisinə kütləvi zərbə endirib. Nəticədə Nikolas Maduro və onun həyat yoldaşı Silia Flores saxlanılaraq Nyu-Yorka aparılıb. ABŞ prezidenti Donald Tramp onların narkoterrorizm və ABŞ-ın təhlükəsizliyinə təhdid yaratmaq ittihamları ilə məhkəmə qarşısına çıxarılacağını açıqlayıb. Amerika məhkəməsində Maduro və Flores irəli sürülən bütün ittihamları rədd edərək özlərini təqsirsiz hesab etdiklərini bəyan ediblər.

ABŞ-ın hərbi əməliyyatından sonra Karakas BMT-nin təcili iclasının çağırılmasını xahiş edib. Venesuela Ali Məhkəməsi dövlət başçısının səlahiyyətlərini müvəqqəti olaraq vitse-prezident Delsi Rodrigesə verib. O, yanvarın 5-də Milli Assambleyanın xüsusi iclasında andiçmə mərasimi ilə rəsmi şəkildə prezident səlahiyyətlərini icra edən şəxs olub.

Rusiya Xarici İşlər Nazirliyi Venesuela xalqı ilə həmrəylik ifadə edib, ABŞ-ı isə vəziyyəti gərginləşdirməməyə və Maduro ilə onun həyat yoldaşını azad etməyə çağırıb. Çin də analoji çağırış edərək ABŞ-ın addımlarını beynəlxalq hüququn pozulması adlandırıb. ABŞ-ı tənqid edən bəyanatla KXDR Xarici İşlər Nazirliyi də çıxış edib.