Media: ABŞ Ukraynanın təhlükəsizlik zəmanətləri ilə bağlı bəyannaməni imzalamayıb

ABŞ Parisdə keçirilən görüşdən sonra Kiyevin təhlükəsizlik zəmanətləri ilə bağlı qəbul edilən bəyannaməni imzalamayıb.

"PostMedia" xəbər verir ki, bu barədə “RİA Novosti” Politico-ya istinadən xəbər verir.

Nəşrin məlumatına görə, əvvəlcə Vaşinqtonun sənədi imzalayacağı gözlənilirdi, lakin bəyannaməyə yalnız ABŞ-ın daxil olmadığı “İstəkli ölkələr koalisiyası”nın nümayəndələri imza atıblar.

Məqalədə qeyd olunur ki, Ukraynaya göndərilməsi planlaşdırılan çoxmillətli qüvvələrdə amerikalı hərbçilərin iştirakı məsələsi sənəddən çıxarılıb. İlkin variantda ABŞ-ın hücum halında bu qüvvələrə yardım göstərməsi, eləcə də kəşfiyyat və logistika dəstəyi təmin etməsi nəzərdə tutulurdu.

Xatırladaq ki, ötən gün Böyük Britaniyanın baş naziri Kir Starmer “İstəkli ölkələr koalisiyası”nın sülh sazişi əldə olunacağı təqdirdə Ukraynada qüvvələrin yerləşdirilməsi ilə bağlı bəyannamə qəbul etdiyini açıqlayıb. Onun sözlərinə görə, Böyük Britaniya və Fransa Ukrayna ərazisində “hərbi hablar” yaradacaq və silah-sursatla hərbi texnikanın saxlanması üçün qorunan məkanlar inşa edəcək.

Rusiya Xarici İşlər Nazirliyi isə Ukraynada NATO üzvü ölkələrin qoşunlarının yerləşdirilməsinin istənilən ssenarisinin qətiyyən qəbuledilməz olduğunu və kəskin eskalasiyaya səbəb olacağını bildirib.

ABŞ prezidenti Donald Trampın xüsusi nümayəndəsi Stiven Uitkoff vurğulayıb ki, Paris danışıqlarında bir sıra əsas məsələlər, o cümlədən Kiyevin təhlükəsizlik zəmanətləri üzrə mühüm irəliləyiş əldə olunub. Onun sözlərinə görə, ABŞ ərazi məsələsi ilə bağlı kompromisə ümid edir.

Trampın kürəkəni Cared Kuşner isə qeyd edib ki, prezident Vladimir Putinlə danışıqlarda Ukrayna üçün təhlükəsizlik zəmanətləri əsas mövzulardan biridir. Onun fikrincə, Paris görüşü sülh sazişinə doğru atılmış mühüm addım olub.

Dekabrın əvvəlində Rusiya lideri Kremlə Uitkoff və Kuşneri qəbul edib. Görüşdə ABŞ tərəfindən təklif olunan təşəbbüs müzakirə edilsə də, kompromis variant tapılmayıb. Putin bildirib ki, Vaşinqton ilkin planın 27 bəndini dörd paketə bölərək ayrıca müzakirə etməyi təklif edib.

Bir neçə gün sonra Berlində ABŞ və Ukrayna nümayəndələri arasında görüş keçirilib. Danışıqlarda Uitkoff, Kuşner və Volodimir Zelenski iştirak edib. Beş saat davam edən görüşdən sonra Uitkoff Ukrayna nümayəndə heyəti ilə danışıqlarda irəliləyiş əldə olunduğunu açıqlayıb. Avropa İttifaqı liderləri də Ukraynaya təhlükəsizlik zəmanətləri və münaqişənin həlli üçün görüləcək tədbirlərlə bağlı bəyanat yayıblar.

Dekabrın sonunda Donald Tramp Floridada Zelenski ilə danışıqlar aparıb. Görüşdən sonra ABŞ prezidenti tərəflərin məsələlərin 95 faizi üzrə razılığa gəldiyini bildirib. Daha sonra Tramp Rusiya prezidenti ilə telefon danışığı aparıb və Putin Ukrayna Silahlı Qüvvələrinin onun rezidensiyasına hücum cəhdi etdiyini deyib.