WP: Putin Ukrayna ilə müharibə səbəbindən Rusiyanı maliyyə iflasına aparır

Rusiya Ukraynadakı müharibə səbəbindən ciddi iqtisadi çətinliklərlə üzləşib və 2026-cı ildə vəziyyət əhəmiyyətli dərəcədə pisləşə bilər.

"PostMedia" xəbər verir ki, bunu "The Washington Post" nəşri yazıb.

ABŞ prezidenti Donald Trampın Rusiyanın guya Ukraynaya qarşı müharibədə üstünlüklərini qoruyub saxlaması barədə bəyanatlarına baxmayaraq, ölkənin iqtisadi vəziyyəti bunun əksini sübut edir.

Rusiya diktatoru Vladimir Putin əvvəllər hərbi xərcləri təmin edən pul ehtiyatlarının və borc vəsaitlərinin əhəmiyyətli hissəsini xərcləyib, qarşıda isə yeni maliyyə sınaqları var. ABŞ-nin Rusiya neft sektoruna qarşı yeni sərt sanksiyaları büdcə kəsirini artırır və maliyyə sistemi üçün əlavə risklər yaradır.

Məhdudiyyətlər "Rosneft" və "Lukoil" də daxil olmaqla ən iri şirkətlərə şamil edilir və Moskvanı neftin hər barreli üçün 20 dollardan çox endirim etməyə məcbur edir. Ekspertlər qeyd edirlər ki, neft-qaz sənayesi böhrana doğru yuvarlanır və yeni tədbirlər bu prosesi daha da sürətləndirir.

Gələn il, hətta Rusiya diktatoru müharibənin dayandırılması ilə bağlı danışıqlarda sərt mövqe tutsa belə, ödənişlərin edilməməsi və bank böhranı riskləri mövcuddur. İqtisadçılar vurğulayırlar ki, 2026-cı il müharibənin Rusiya iqtisadiyyatı üçün həqiqətən ağır keçəcəyi ilk il ola bilər.

Eyni zamanda, Rusiya elitasının əksər nümayəndələri kütləvi sosial etirazlar və ya iqtisadi çətinliklərin Kremlinin siyasi qərarlarına təsir edəcəyini gözləmirlər.

Xatırladaq ki, 2025-ci ilin sonunda Rusiyada iqtisadi vəziyyət inflyasiyanın sürətlənməsi, hərbi xərclərlə bağlı büdcə kəsirinin artması və neft-qaz gəlirlərinin azalması fonunda pisləşməkdə davam edir, iqtisadi artım tempisə nəzərəçarpacaq dərəcədə yavaşlayır.

Qeyd edək ki, Rusiyada Yeni il bayramına hazırlıq istehlakçı aktivliyinin əhəmiyyətli dərəcədə azalması şəraitində keçir, çünki qiymət artımı Rusiya vətəndaşlarını xərcləri ixtisar etməyə və adəti alış-verişlərdən imtina etməyə məcbur edir.