Netanyahu İrandakı vəziyyətlə bağlı İsrail ordusuna döyüş hazırlığı əmri verib

İsrailin Baş naziri Binyamin Netanyahu İsrail Müdafiə Qüvvələrinə (IDF) və milli təhlükəsizlik qüvvələrinə İranla bağlı hər hansı bir ssenariyə qarşı hazırlıqlı olmağı əmr edib.

"PostMedia" xəbər verir ki, bu barədə baş nazir öz dar təhlükəsizlik kabinetinin iclasından əvvəl yazdığı videomüraciətdə bildirib.

Vaşinqtonun diplomatik səylərini şərh edən Netanyahu qeyd edib ki, ABŞ prezidenti Donald Tramp bu və ya digər şəkildə İrandan zənginləşdirilmiş uranın çıxarılmasına nail olmağı gözləyir. Bununla belə, İsrail lideri ayıq-sayıq olmağın vacibliyini vurğulayıb və əlavə edib ki, bu gün "İsrail həmişəkindən daha güclüdür".