Qazaxıstan neft ixracında Azərbaycan marşrutlarından istifadəni artırmağı planlaşdırır

Qazaxıstan neftinin ixracı üçün Azərbaycan üzərindən keçən alternativ marşrutların genişləndirilməsi gündəmdədir.
“PostMedia” xəbər verir ki, bu barədə Qazaxıstanın Energetika Nazirliyi məlumat paylaşıb. Ölkə Xəzər Boru Kəməri Konsorsiumunun (KTK) neft qəbuluna müvəqqəti məhdudiyyətlər tətbiq etməsi səbəbindən iyulda neftin bir hissəsini digər marşrutlara yönləndirib.
Nazirlik əlavə ixrac marşrutları arasında Bakı-Tbilisi-Ceyhan (BTC) boru kəmərini, Xəzər dənizi üzərindən Azərbaycan ərazisi ilə daşımaları və Bakı-Supsa marşrutunu nəzərdən keçirir.
Məlumata görə, hazırda Bakı-Tbilisi-Ceyhan sistemi ilə ildə təxminən 1,2 milyon ton Qazaxıstan nefti nəql olunur. Azərbaycan tərəfi isə Qazaxıstan neftinin qəbulunu ildə 2,2 milyon tona qədər artırmağa hazır olduğunu bildirib.
Qeyd edək ki, Qazaxıstan neftinin əsas hissəsi — təxminən 80 faizi — KTK vasitəsilə dünya bazarlarına çıxarılır. İyul və avqust aylarında Novorossiysk yaxınlığındakı KTK obyektləri dəfələrlə Ukrayna dronlarının hücumlarına məruz qalıb.