Mirzoyan: “Sabah Ermənistan–Türkiyə sərhədinin açılması xəbərini eşidə bilərik”

“Biz Türkiyə ilə münasibətləri normallaşdırırıq. Sərhəd hələ də bağlıdır, lakin düşünürəm ki, proses artıq xeyli yetkinləşib və tamamilə mümkündür ki, sabah səhər oyanıb xəbərlərdə ‘Ermənistan–Türkiyə sərhədi açıqdır’ başlığını görək”.

"PostMedia" xəbər verir ki, Ermənistanın xarici işlər naziri Ararat Mirzoyan oktyabrın 13-də Varşava Təhlükəsizlik Forumunda çıxış edərək Türkiyə ilə münasibətlərin normallaşdırılması prosesinin xeyli irəlilədiyini bildirib.

Nazir Ermənistanla Azərbaycan arasında sülhün əldə olunduğunu, ikitərəfli ticarətin başladığını və regional nəqliyyat kommunikasiyalarının açılması istiqamətində işlərin davam etdiyini də qeyd edib. Bununla belə, həllini gözləyən bəzi məsələlərin qaldığını vurğulayıb.

Mirzoyan Ermənistanın Avropa İttifaqı ilə münasibətlərinin görünməmiş dərəcədə dərinləşdiyini, əməkdaşlığın təhlükəsizlik, iqtisadiyyat, ticarət və xarici siyasət sahələrini əhatə etdiyini bildirib. Onun sözlərinə görə, Ermənistanın Aİ-yə üzvlüyünün son məqsədi hələ dəqiq müəyyənləşməyib.

Nazir həmçinin ABŞ və Avropa İttifaqının Cənubi Qafqazda maraqlarının üst-üstə düşdüyünü və regionda nəqliyyat əlaqələrinin açılması istiqamətində əməkdaşlıq etdiklərini qeyd edib.