İran ABŞ ilə qarşıdurma zamanı taktikasını dəyişib - "Reuters"

İran Hörmüz boğazından keçən gəmilərə hücumlarla bağlı yeni taktika tətbiq edir. Məqsəd neft qiymətlərini yüksək səviyyədə saxlamaq və ABŞ-də keçiriləcək aralıq seçkilərə təsir göstərməkdir.

"PostMedia" xəbər verir ki, bu barədə "Reuters" agentliyinə iki yüksək vəzifəli iranlı rəsmi məlumat verib.

Tehran fevralın 28-də ABŞ və İsrailin İrana qarşı zərbələrə başlamasından sonra Hörmüz boğazı üzərində nəzarəti ələ keçirməyə çalışır. İran müharibədən əvvəl dünya üzrə neft və mayeləşdirilmiş təbii qaz tədarükünün təxminən beşdə birinin həyata keçirildiyi bu su yolunda gəmi hərəkətini məhdudlaşdıraraq Vaşinqtona təzyiq rıçaqları əldə etməyə çalışır.

Təhdidlər və hücumlar boğazdan gəmi keçidini ciddi şəkildə məhdudlaşdırıb və nəticədə neft qiymətləri artıb.

İranlı rəsmilərdən birinin sözlərinə görə, Tehran təxminən 10 gün əvvəl müəyyən edilmiş məhdudiyyətləri pozduğunu hesab etdiyi gəmilərə qarşı müxtəlif hücum üsullarından istifadə etməyə başlayıb. Onun bildirdiyinə görə, bu dəyişiklik həmin gəmilərə hücumların sayının artmasına səbəb olub.

Yeni strategiya həm hücumların üsullarının, həm də intensivliyinin dəyişdirilməsini nəzərdə tutur. Məqsədlərdən biri də ABŞ-də keçiriləcək seçkilərin nəticələrinə təsir göstərməkdir.

“Məqsəd ABŞ-nin və onun müttəfiqlərinin dünya neft qiymətlərini aşağı salmaq cəhdlərini uğursuzluğa düçar etməkdir”, - deyə iranlı rəsmilərdən biri bildirib.

İran rəsmilərinin sözlərinə görə, yeni strategiyanın tətbiqi barədə qərar ölkənin ən yüksək rəhbərlik səviyyəsində qəbul edilib.

Anonimlik şərti ilə danışan amerikalı hərbi rəsmi də İranın taktikasını əhəmiyyətli dərəcədə dəyişdirdiyini təsdiqləyib.

Onun sözlərinə görə, ABŞ İranın radar imkanlarının böyük hissəsini məhv etdikdən sonra İslam İnqilabı Keşikçiləri Korpusu potensial hədəfləri, o cümlədən ABŞ hərbi gəmilərini müəyyənləşdirmək üçün silahsız müşahidəçilərin olduğu kiçik qayıqlardan istifadə etməyə başlayıb.