Ukraynanın XİN başçısı İrana gəmi insidentinin səbəblərini izah edib və gərginliyin artmamasına çağırıb

Ukraynanın xarici işlər naziri Andriy Sıbiqa İranın xarici işlər naziri Abbas Əraqçi ilə İran gəmisi ətrafında baş vermiş insidentdən sonra telefon danışığı apardığını bildirib. Onun sözlərinə görə, Kiyev vəziyyətin daha da gərginləşməsinin qarşısının alınmasında maraqlıdır və Ukraynanın mövqeyini İran tərəfinə izah edib.

"PostMedia" xəbər verir ki, bu barədə o, özünün "X" hesabında məlumat verib.

"Diplomatiya, hətta mürəkkəb hallarda belə, birbaşa dialoq deməkdir. Mən vurğuladım ki, məqsədimiz gərginliyin əsassız şəkildə artmasının qarşısını almaqdır".

Ukraynalı nazir qeyd edib ki, Kiyevin bütün hərəkətləri yalnız ölkənin Rusiyanın təcavüzündən müdafiəsinə yönəlib və "heç vaxt mülki gəmiləri və ya insanları qəsdən hədəf almayıb".

İranın öz vətəndaşının həlak olması və mülki gəminin zədələnməsi ilə bağlı açıqlamalarını şərh edən Sıbiqa bildirib ki, Ukrayna Tehranla qarşıdurma istəmir və əsas məqsədi Rusiyanın təcavüzünə qarşı mübarizə aparmaqdır. Onun sözlərinə görə, müharibə ilə bağlı "bütün təxribatlar və insan tələfatına" görə məsuliyyət Moskvanın üzərinə düşür.

Sıbiqa eyni zamanda İranı gərginliyi artıra biləcək addımlardan çəkinməyə və Ukraynaya qarşı müharibədə Rusiyaya göstərdiyi dəstəyi dayandırmağa çağırıb.