Zatulin: "Paşinyanın hakimiyyəti dövründə Ermənistanla ticarət münasibətlərində yumşalma olmayacaq"

Rusiya Dövlət Dumasının MDB məsələləri üzrə komitə sədrinin müavini Konstantin Zatulin Rusiya ilə Ermənistan arasında ticarət-iqtisadi münasibətlərdə mümkün yumşalmalardan danışıb.

"PostMedia" xəbər verir ki, o, "NSN"ə açıqlamasında bildirib ki, Baş nazir Nikol Paşinyan hakimiyyətdə olduğu müddətdə belə bir yumşalma baş verməyəcək.

Parlamentari vurğulayıb ki, iki ölkə arasında münasibətlərin pisləşməsi İrəvanın Moskvanın rəqibləri ilə ittifaqlar yaratmağa çalışan siyasəti ilə bağlıdır.

"Daimi təmaslara baxmayaraq, cənab Paşinyan hakimiyyətdə olduğu müddətdə heç bir yumşalma olmayacaq", - Zatulin bildirib.

O əlavə edib ki, Rusiya Ermənistanın həyata keçirdiyi şantaja boyun əyməyəcək.

Deputat həmçinin hesab edir ki, Paşinyan Ermənistanın Avropa İttifaqına üzvlüyü ilə bağlı referendum keçirməyəcək. Zatulin bunu Baş nazirin referendumda məğlub olmaqdan qorxması ilə əlaqələndirib.