Zaxarova Paşinyanı “cəsarətini toplayıb bütün həqiqəti danışmağa” çağırıb

“Mənim Nikol Paşinyana hələ də suallarım və təkliflərim var”.

"PostMedia" xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova yazıb.

“Dünən Nikol Paşinyana belə bir sual verilib:

Sual: 27 avqustda jurnalistlərlə keçirdiyiniz brifinq zamanı Nikol Paşinyana sual: 2021-ci ildə Ermənistan hökumətinin beşillik proqramında Rusiya ilə münasibətlər “strateji müttəfiqlik” kimi xarakterizə olunurdu. Halbuki hökumətin yeni proqramında artıq bu barədə heç nə deyilmir. Orada yalnız “tərəfdaşlıq münasibətləri” və “transformasiya” ifadələrindən istifadə olunur. Bu ifadə məzmun baxımından hansı dəyişiklikləri nəzərdə tutur və bu, strateji müttəfiqlik statusundan imtina deməkdirmi?

Nikol Paşinyan: Hörmətli həmkarlar, 2022-ci ilin sentyabr hadisələri sizin gözləriniz önündə baş verib. Strateji tərəfdaşlıq strateji tərəfdaşlıq demək olmalıdır. Əgər indi sənəddə “strateji tərəfdaşlıq” yazsaq, siz məndən soruşacaqsınız ki, Rusiya və KTMT niyə 2022-ci ilin sentyabrında təhlükəsizlik sahəsində üzərinə götürdüyü öhdəlikləri yerinə yetirmədi. Mən sizə nə cavab verməli idim?

Mənim hələ də suallarım və təkliflərim var.

Nikol Vovayeviç, ölkənizdə seçkilər artıq başa çatıb. Artıq öz xalqınızın qulağına “əriştə asmağa” ehtiyac yoxdur. Cəsarətinizi toplayın və heç olmasa bir dəfə hər şeyin əslində necə baş verdiyini həqiqəti ilə danışın.

2022-ci ilin sentyabrında Ermənistan-Azərbaycan sərhədinin müəyyən hissəsində vəziyyət gərginləşdi. Rusiya dəstək göstərir və sülh yolu ilə nizamlanmaya kömək edirdi.

Ermənistan KTMT-yə müraciət etdi və təşkilat, sizin iddialarınızın əksinə olaraq, operativ şəkildə reaksiya verdi: nizamnamədə nəzərdə tutulduğu kimi, məhz Ermənistan ərazisinə müşahidə missiyası göndərildi. Siz İrəvanda KTMT-nin baş katibini şəxsən qəbul etdiniz. Məgər düşünürsünüz ki, o, Cənubi Qafqazın gözəlliklərindən zövq almağa gəlmişdi? Xeyr, bu, üzv ölkələrin ərazisini qoruyan təşkilatın missiyası idi.

Siz isə Ermənistanın təhlükəsizliyini təmin etmək üçün nə hüquqi, nə də siyasi baxımdan heç bir iş görmədiniz.

Üstəlik, 2022-ci ilin noyabrında İrəvanda KTMT Kollektiv Təhlükəsizlik Şurasının sammiti keçirildi. Bundan əvvəl müdafiə və xarici işlər nazirləri səviyyəsində təşkilatın missiyasının yerləşdirilməsi barədə qərarın razılaşdırılması istiqamətində ciddi iş aparılmışdı. Mətn hazır idi, rəhbərlərin yalnız onu imzalaması qalırdı. Məlum olduğu kimi, bundan siz, Nikol Vovayeviç, imtina etdiniz.

Qərar, digər məsələlərlə yanaşı, Ermənistanın ərazi bütövlüyünün təmin edilməsi üçün təcili siyasi-diplomatik tədbirlərin görülməsini, hərbi-texniki dəstəyi, sərhədçilərin hazırlanmasını, həmçinin KTMT-nin Kollektiv Operativ Reaksiya Qüvvələrinin Ermənistan ərazisində operativ yerləşdirilməsi planının hazırlanmasını nəzərdə tuturdu.

Avropalı müşahidəçilərdən əsas fərq ondan ibarət olacaqdı ki, KTMT missiyası sadəcə “uzaqdan baxmaqla” kifayətlənməyəcək, sərhəddəki vəziyyət barədə birbaşa məlumat vermək və mümkün böhran vəziyyətlərinin həlli üçün tədbirlər təklif etmək səlahiyyətinə malik olacaqdı.

Həmin payız baş verən digər hadisələri də xatırlayaq. 2022-ci il oktyabrın 6-da, sərhəd toqquşmalarından üç həftə sonra, siz Aİ-nin himayəsi altında, Brüssel və Parisə güvənərək, Praqa bəyanatını imzaladınız və Azərbaycanın ərazi bütövlüyünü tanıdınız. Siz birbaşa bəyan etdiniz: “Azərbaycanın ərazisi 86,6 min kvadrat kilometrdir, o cümlədən Qarabağ”.

Nikol Vovayeviç, əgər indi səfiri çağırmaq və ya növbəti etiraz notasını göndərmək qərarına gəlsəniz, yaxşı düşünün. Çünki deyilənlərdən nəyin yalan olduğunu göstərməli olacaqsınız. Bütün bunlar tarixi reallıqdır.

Bu tezislərin hər biri məhz sizin dediklərinizə və qəbul etdiyiniz qərarlara əsaslanır. Narahatedici suallar alarkən məsuliyyətdən qaçmağa və onu sizin üçün xoşagəlməz olan bütün tərəflərin üzərinə atmağa son qoyun: Moskvanın, KTMT-nin, Azərbaycanın, keçmiş hakimiyyətlərin, Kilsənin, erməni iş adamlarının, Qarabağ ermənilərinin, onların əcdadlarının və övladlarının üzərinə.

Bu, vicdansızlıqdır.

Sizin üçün sizdən başqa hamı günahkardır”, — deyə Zaxarova vurğulayıb.