Milyarder yaxtasının adını tərsinə oxuduqdan sonra onu dəyişdirib

"Oracle" şirkətinin həmtəsisçisi, milyarder Larri Ellison özünün "Izanami" adlı yaxtasının adını təcili olaraq dəyişdirmək məcburiyyətində qalıb. "PostMedia" Avstraliyanın news.com.au portalınıa istinadən xəbər verir ki, buna səbəb adın hərflərini tərsinə oxuduqda "mən nasistəm" (I'm a nazi) ifadəsinin alınması olub.

"Oracle"ın həmtəsisçisi Larri Ellison Almaniya istehsalı olan yeni yaxtasına 'Izanami' adını verərkən, bu adı tərsinə çevirdikdə 'mən nasistəm' ifadəsinin alındığından tamamilə xəbərsiz olub. İsrail ilə sıx ailə bağları olan Ellisonun, adın tərsinə oxunuşundakı təhqiramiz mənadan xəbər tutan kimi boya həlledicisinə müraciət edərək gəminin adını dəyişdirməyə tələsdiyi bildirilir", — deyə portalın xəbərində qeyd olunur.

Bildirilir ki, iş adamı ilkin olaraq yapon mifologiyasından ilhamlanaraq yaxtaya sintoist ilahəsinin şərəfinə bu adı seçmişdi. Hadisədən sonra Ellison başqa bir yapon termini olan "Ronin" adında qərar qılıb və daha sonra gəmini satıb. Hazırda yaxta italyan iş adamı Alessandro Del Bonoya məxsusdur.

Amerikanın "Oracle" şirkəti 1977-ci ildə təsis edilib və mərkəzi ofisi Texas ştatının Ostin şəhərində yerləşir. Bu, dünyanın ən böyük proqram təminatı istehsalçılarından biridir.