Misir hərbi təyyarəsi Ermənistanın hava məkanından istifadə edərək Bakıya uçub

Misirə məxsus CASA C295 tipli hərbi-nəqliyyat təyyarəsi Azərbaycan istiqamətində uçuş həyata keçirərkən Ermənistanın hava məkanından istifadə edib.

Adətən, hərbi təyyarələr, o cümlədən silah daşıyan bortlar Azərbaycana Türkiyə və Gürcüstan üzərindən uçur. Qeyri-mülki təyyarələrin (rəsmi, o cümlədən hərbi) hər hansı ölkənin hava məkanından keçidi isə həmin ölkənin Xarici İşlər Nazirliyinin xüsusi icazəsini tələb edir.

Qahirə–Bakı reysi 2025-ci ilin dekabr ayının əvvəlində həyata keçirilib. Həmin gün təyyarə yenidən Ermənistan hava məkanı üzərindən Misirə qayıdıb.

Sputnik Ermənistan agentliyi uçuşun məqsədini aydınlaşdırmaq üçün Ermənistan XİN-ə sorğu göndərib. Nazirlikdən bildirilib ki, söhbət şəxsi səfərdən gedir.

“Qeyd edirik ki, Ermənistanın hava məkanı üzərindən Qahirə–Bakı reysini yerinə yetirən təyyarə sərnişin təyyarəsidir və Azərbaycana yüksək vəzifəli bir şəxsi şəxsi səfər çərçivəsində aparıb”, – deyə XİN-in cavabında qeyd olunub.

Bildirilir ki, bu, Misirdən həyata keçirilən ilk belə uçuş deyil. Yaz aylarında Misir Hərbi Hava Qüvvələrinə məxsus başqa bir təyyarə də Ermənistan üzərindən uçaraq Qırğızıstana gedərkən Azərbaycanda eniş etmişdi.

Həmin vaxt da Sputnik Ermənistan Ermənistan XİN-ə sorğu göndərmişdi. Nazirlik Misir tərəfinə istinadla uçuşun təlimlərlə bağlı olduğunu bildirmişdi.