Paşinyan avtomobilinin nömrəsini dəyişir

Ermənistan Baş naziri Nikol Paşinyana xidmət edən avtomobilin dövlət nömrə nişanı bundan sonra erməni üçrəngli bayrağı və yanında “1” rəqəmindən ibarət olacaq.

"PostMedia" xəbər verir ki, üvafiq qərar hökumətin bugünkü iclasında qəbul edilib.

Brifinq zamanı jurnalistin sualını cavablandıran Paşinyan xatırladıb ki, indiyədək avtomobilin nömrə nişanı “001 SS” olub. Onun sözlərinə görə, bu, Ermənistanın üçüncü prezidenti Serj Sarqsyanın adının baş hərfləridir.

“Biz hesab edirik ki, dövlət nömrə nişanı heç kimin adının baş hərflərini daşımamalıdır, indi də, məsələn, "NP" olmamalıdır. Bu, dövlət seçimi məsələsidir və qərar protokol qaydalarının qorunması məntiqi ilə qəbul edilib. Biz nə qədər qeyri-formal yanaşmaların tərəfdarı olsaq da, bu, dövlət protokolunun əsaslarını sıfırlamaq demək deyil”, - deyə Paşinyan bildirib.

Qeyd olunur ki, layihə Ermənistan Respublikasının Daxili İşlər Nazirliyi tərəfindən hazırlanıb.