Tramp “Pis Santa"nı ABŞ-yə girməməyə çağırıb

Vaşinqton Santa Klausun bütün dünyada hərəkətini izləyir ki, onun “özünü yaxşı apardığına” əmin olsunlar.

"PostMedia" xəbər verir ki, bunu ABŞ Prezidenti Donald Tramp Milad tədbiri zamanı uşaqların suallarını cavablandırarkən deyib.

“Biz əmin olmaq istəyirik ki, o zərərli deyil. Heç bir pis Santanın ölkəmizə girmədiyinə əmin olmaq istəyirik. Biz öyrəndik ki, Santa Klaus yaxşıdır”, – deyə ABŞ lideri vurğulayıb.

Qeyd olunur ki, Santa Klausun bayram marşrutunu “izləmək” ənənəsi ABŞ-da 1955-ci ildə başlayıb. Belə ki, bir pərakəndə satış şirkətinin reklamında uşaqların hədiyyə arzularını bildirmək üçün zəng edə biləcəyi telefon nömrəsi səhv göstərilib. Nəticədə uşaqlar ABŞ-ın Materik Hava Hücumundan Müdafiə Komandanlığının (hazırda NORAD) rəhbəri, polkovnik Harri Şoupənin nömrəsinə zəng etməyə başlayıblar.

O isə vəziyyətdən çıxış yolu taparaq uşaqlara bildirib ki, hərbçilər Santa Klausun hava hərəkətinə nəzarət edir və onun göydə azmamasını təmin edirlər. Bundan sonra təyyarə uçuşları və raket buraxılışlarını izləyən sistem Santa Klausun hərəkətini də monitorinq etməyə başlayıb.