Böyük gəmiçilik şirkətləri gəmilərinin Hörmüz boğazından keçidini bərpa edirlər

ABŞ və İran arasında razılaşma əldə olunmasından sonra iri gəmiçilik şirkətləri gəmilərinin Hörmüz boğazından keçidini bərpa etməyə başlayıblar.

"PostMedia" xəbər verir ki, bu barədə "Lloyd’s List Intelligence" analitik dənizçilik şirkəti məlumat yayıb.

Brifinq zamanı "Lloyd’s List"in baş redaktoru Riçard Mid bildirib ki, son 110 gün ərzində ilk dəfə olaraq böyük operatorların gəmiləri yenidən boğazdan keçməyə başlayıb. Bu, fevral ayından etibarən tranzitin faktiki olaraq dayanmasından sonra baş verib.

Şirkətin məlumatına görə, cümə axşamı gününə olan vəziyyət üzrə boğazdan keçən gəmilərin dəqiq sayı açıqlanmayıb. Bununla belə, qeyd olunur ki, Hörmüz boğazından "Grimaldi Group", "Cosco", "Knutsen" və "NYK" kimi iri gəmiçilik qruplarına məxsus və ya onların idarə etdiyi tanker gəmiləri keçib.

Eyni zamanda, "Lloyd’s List"in məlumatına əsasən, boğaza İran bayrağı altında üzən iki tanker də daxil olub. Həmin tankerlər "National Iranian Tanker Company"yə məxsusdur və hazırda sanksiyalar altındadır.