Kreml Trampın Ukraynanın əraziləri qaytara biləcəyi ilə bağlı sözlərinə cavab verib

Kreml ABŞ Prezidenti Donald Trampın Rusiya-Ukrayna münaqişəsinə dair bəyanatları ilə razı olmadığını bildirib. "PostMedia"nın məlumatına görə, Rusiya Prezidentinin mətbuat katibi Dmitri Peskov Radio RBC-yə açıqlamasında qeyd edib ki, Trampın mövqeyinin dəyişməsinə Ukrayna lideri Vladimir Zelenski ilə görüşü təsir edib.

“Dünən onların görüşü baş tutdu. Təbii ki, cənab Tramp Zelenskinin versiyasını eşitdi. Görünür, həmin an məhz bu versiya onun səsləndirdiyi qiymətləndirmələrin səbəbi oldu".

Kremlin Trampın açıqlamalarına dərhal reaksiya verməməsinə gəlincə, Peskov vurğulayıb ki, bəyanatlar Moskvada gecə vaxtı səsləndirildiyi üçün cavabın dərhal verilməsi qeyri-adi olardı.

Xatırladaq ki, Tramp BMT Baş Assambleyası çərçivəsində Zelenski ilə görüşdən sonra Rusiyanın Ukraynada iştirakını “mənasız” adlandırıb, Rusiyanın iqtisadiyyatını “dəhşətli vəziyyətdə” olduğunu bildirib və yeni rüsumların tətbiq oluna biləcəyini istisna etməyib. O, həmçinin Avropa İttifaqının dəstəyi ilə Ukraynanın bütün itirilmiş əraziləri, hətta daha artığını qaytara biləcəyini vurğulayıb.

Moskva isə Kiyevə istənilən ərazi güzəştini qətiyyən istisna etmir. Rusiya Prezidenti Vladimir Putin dəfələrlə bəyan edib ki, atəşkəs üçün Ukrayna qoşunlarının DNR, LNR, Zaporojye və Xerson vilayətlərindən çıxarılması, həmçinin bu bölgələrin və Krımın Rusiya ərazisi kimi tanınması əsas şərtdir. Putin avqustun əvvəlində də bu tələblərin dəyişmədiyini vurğulamışdı.