Rubio: "ABŞ-nin Kuba böhranı ilə əlaqəsi yoxdur"

ABŞ dövlət katibi Marko Rubio Kubada mümkün böhranla bağlı ittihamları rədd edib. O, iqtisadi blokada tətbiq edən ABŞ-nin adada vəziyyətin pisləşməsi ilə heç bir əlaqəsinin olmadığını iddia edib.

"PostMedia" xəbər verir ki, bunu Rubio Kolumbiyada jurnalistlərə bildirib.

"Düşünürəm ki, hamıya xatırlatmaq vacibdir ki, bu, ötən həftə başlamayıb. Kuba artıq üç-dörd ildir, bəlkə də daha uzun müddətdir, humanitar fəlakət şəraitində yaşayır".

Dövlət katibi adadakı humanitar böhrana görə bütün məsuliyyəti Kuba hakimiyyətinin üzərinə qoyub.

Sentyabr ayında Kuba xarici işlər naziri Bruno Rodriges Parrilya ABŞ-ın ticarət və maliyyə blokadası səbəbindən ölkəyə dəyən rekord zərərin məbləğini açıqlayıb. Onun sözlərinə görə, 2025-ci il martın 1-dən 2026-cı il fevralın 28-dək olan dövrdə bu məbləğ 8,083 milyard dollara çatıb. Bu, əvvəlki rekord göstəricidən 7% çoxdur.

Nazir əlavə edib ki, ABŞ-ın onilliklərdir davam edən təzyiqləri nəticəsində Kubanın cari qiymətlərlə ümumi itkiləri 178,7 milyard dollar təşkil edib. Bu hesablamaya ABŞ-ın enerji embarqosu və ikinci dərəcəli sanksiyalarının vurduğu zərər daxil edilməyib.

Avqust ayında ABŞ Kuba ilə bağlı sanksiyaları genişləndirib. Məhdudiyyətlər siyahısına Kuba Xalqları ilə Dostluq İnstitutunun (ICAP) üç rəhbəri və tikinti nazirliyi də daxil olmaqla doqquz təşkilat əlavə edilib. Həmçinin mədənçıxarma, metallurgiya, xarici ticarət və digər sahələrdə fəaliyyət göstərən müəssisələrə qarşı da məhdudiyyətlər tətbiq olunub.

Kuba xarici işlər naziri daha əvvəl bildirib ki, ABŞ-ın yeni tədbirləri əhalinin əsas xidmətlərlə təmin olunmasına mane olur.

ABŞ 1960-cı illərin əvvəllərindən etibarən Kubaya qarşı iqtisadi embarqo tətbiq edir. Son illərdə Vaşinqton sanksiya təzyiqini daha da genişləndirib. Kuba hakimiyyəti isə dəfələrlə bildirib ki, məhdudiyyətlərin sərtləşdirilməsi yanacaq çatışmazlığının, elektrik enerjisinin verilməsində fasilələrin və iqtisadi böhranın dərinləşməsinin əsas səbəblərindən biridir.

2026-cı ilin yayında Kuba rəhbərliyi genişmiqyaslı iqtisadi islahatlar həyata keçirəcəyini açıqlayıb. Hakimiyyət bu qərarı gücləndirilmiş sanksiya təzyiqi şəraitinə uyğunlaşmaq zərurəti ilə əsaslandırıb.