Demokratlar Epşteynin xarici hökumətlərlə əlaqələrini araşdırır

ABŞ Konqresində demokratlar, cinsi cinayətlərə görə məhkum olunmuş Ceffri Epşteynin xarici hökumətlərin maraqları naminə qeydiyyatsız agent kimi fəaliyyət göstərdiyi və prezident Donald Trampla əvvəlki münasibətlərindən bu məqsədlə istifadə etməyə çalışdığı iddialarını araşdırmağa başlayıblar.

"PostMedia" "Axios"a istinadən xəbər verir ki, Nümayəndələr Palatasının Hüquq Komitəsinin üzvü Ceymi Raskin bu məsələ ilə bağlı ABŞ administrasiyasına rəsmi sorğu göndərib. O bildirib ki, Epşteyn işi üzrə açıqlanan sənədlər maliyyəçinin Səudiyyə Ərəbistanı, Küveyt, İsrail və Rusiya ilə əlaqələrini göstərir.

Raskinin sözlərinə görə, yazışmalardan birində Epşteyn Səudiyyə Ərəbistanına "maliyyə etibarnaməsi" kimi xidmət göstərməyə hazır olduğunu bildirib və krallığın maraqlarını təmsil etməyi təklif edib. O, həmçinin Səudiyyə Ərəbistanının vəliəhdi Məhəmməd bin Salmanın Epşteynlə yaxın münasibətlərinin elektron məktublarda əks olunduğunu iddia edib.

Konqresmen bildirib ki, Epşteyn 2017-ci ildə Küveyt əmiri üçün Donald Trampla münasibətlər barədə də məsləhətlər verib. Sənədlərdə onun İsrailin keçmiş baş naziri Ehud Baraka ABŞ, Rusiya və Yaxın Şərq diplomatiyası məsələlərində müşayiət etdiyi, eləcə də rusiyalı yüksək vəzifəli şəxslərə Trampla necə davranmaq barədə tövsiyələr verdiyi də qeyd olunur.

Raskin Baş prokurorun səlahiyyətlərini icra edən Tod Blanş, dövlət katibi Marko Rubio və digər rəsmilərə ünvanladığı məktubda vurğulayıb ki, Epşteyn heç vaxt xarici agent kimi qeydiyyatdan keçməyib, baxmayaraq ki, mövcud materiallar onun bir sıra xarici hökumətlərin maraqları naminə fəaliyyət göstərdiyini göstərir.

O, hökumətdən avqustun 3-dək Epşteynin 19 ölkə, o cümlədən Səudiyyə Ərəbistanı, İsrail, Küveyt, Rusiya və Qətərlə əlaqələrinə dair sənədləri təqdim etməyi tələb edib. Bundan əlavə, Ədliyyə Nazirliyindən Epşteynin Xarici Agentlərin Qeydiyyatı Aktı (FARA) çərçivəsində araşdırılıb-araşdırılmadığı barədə məlumat istəyib.

"Ağ Ev"in mətbuat katibi Ebiqeyl Cekson isə "Axios"a açıqlamasında Donald Trampın Epşteynlə bağlı bütün ittihamlar üzrə tam bəraət aldığını bildirib.