Bolqarıstan Ukraynaya dəstək verən “könüllülər koalisiyası”ndan çıxıb

Bolqarıstan Ukraynanı Rusiyanın təcavüzünə qarşı dəstəkləyən ölkələr qrupuna – “könüllülər koalisiyası”na artıq qoşulmayacaq.

"PostMedia" xəbər verir ki, bu barədə ölkənin baş naziri Rumen Radev açıqlama verib.

Radevin sözlərinə görə, Sofiya Ukraynaya maliyyə və hərbi yardımın davam etdirilməsini müdafiə edən koalisiyada iştirak etmir. O bildirib ki, münaqişənin həlli hərbi yollarla deyil, diplomatik vasitələrlə mümkün ola bilər.

Bolqarıstanın baş naziri Ukraynaya hərbi yardımın verilməsinin tənqidçisi kimi tanınır. O, hakimiyyətə gəldikdən sonra Kiyevə pulsuz hərbi dəstəyi dayandırıb, lakin silah satışlarının davam etdiyini bildirib.

Radev daha əvvəl də Rusiyaya qarşı bəzi Aİ sanksiyalarına, o cümlədən Rus Pravoslav Kilsəsinin rəhbər şəxsləri və “Lukoyl” şirkətinin təsisçisi ilə bağlı məhdudiyyətlərə qarşı çıxıb. O, Moskva ilə “praqmatik münasibətlərin” tərəfdarı olduğunu qeyd edib.