Tramp Yaxın Şərqə ikinci aviadaşıyıcı zərbə qrupunun göndərilməsi imkanını müzakirə etdiyini bildirib

ABŞ Prezidenti Donald Tramp bildirib ki, İranla danışıqların uğursuzluğa düçar olacağı halda mümkün hərbi əməliyyatlara hazırlaşmaq məqsədilə Yaxın Şərqə ikinci aviadaşıyıcı zərbə qrupunun göndərilməsi məsələsini müzakirə edir.

"PostMedia" xəbər verir ki, bu barədə o, "Axios"a verdiyi müsahibəsində deyib.

ABŞ və İran ötən cümə günü Omanda, iyunda baş vermiş 12 günlük müharibədən sonra ilk dəfə olaraq danışıqları bərpa etsələr də, Tramp eyni zamanda Fars körfəzində genişmiqyaslı hərbi qüvvə cəmləşdirməyə başlayıb.

“Ya razılığa gəlirik, ya da əvvəlki dəfə olduğu kimi çox sərt addım atmalı olacağıq”.

Tramp növbəti həftə ABŞ–İran danışıqlarının ikinci raundunun keçiriləcəyini gözlədiyini deyib.

“Oraya gedən bir donanmamız var və ola bilsin ki, daha biri də göndərilsin,” — deyə Tramp əlavə edib və daha bir aviadaşıyıcı zərbə qrupunun göndərilməsi üzərində “düşündüyünü” vurğulayıb.

Nəşrin məlumatına görə, amerikalı bir rəsmi regiona ikinci aviadaşıyıcı zərbə qrupunun göndərilməsi məsələsinin müzakirə olunduğunu təsdiqləyib.

Bu, qırıcı təyyarələr, “Tomahawk” raketləri və bir neçə hərbi gəmini özündə birləşdirən “Abraham Lincoln” aviadaşıyıcısı və onun zərbə qrupuna əlavədir. Qəzza müharibəsinin böyük hissəsi ərzində ABŞ regionda iki aviadaşıyıcı saxlayırdı.

Eyni zamanda, ABŞ prezidenti diplomatik yolun perspektivləri ilə bağlı nikbinlik ifadə edərək bildirib ki, İran “çox ciddi şəkildə razılaşma əldə etmək istəyir” və hərbi təhdid səbəbindən əvvəlki danışıqlarla müqayisədə daha ciddidir.

“Keçən dəfə onlar bunu edəcəyimə inanmırdılar,” — deyə Tramp iyun ayında İranın nüvə obyektlərinə zərbə endirmək qərarına işarə edərək bildirib. — “Onlar öz güclərini həddən artıq qiymətləndirdilər. Bu dəfə isə tamamilə fərqli danışıqlar gedir.”