Böyük Britaniya bir rusiyalı diplomatı ölkədən çıxarır

Böyük Britaniya hakimiyyəti bir rusiyalı diplomatın akkreditasiyasını ləğv edərək onu ölkədən çıxarmaq qərarı verib. "PostMedia" xəbər verir ki, bu barədə Böyük Britaniya hökuməti məlumat yayıb.

Qərarın Rusiyanın addımlarına cavab olduğu bildirilir. Yanvarın ortalarında Rusiya Federal Təhlükəsizlik Xidməti Moskvadakı Böyük Britaniya səfirliyinin əməkdaşı Qaret Samuel Devisin Britaniya xüsusi xidmət orqanları ilə əməkdaşlıq etdiyini açıqlamış, diplomat akkreditasiyadan məhrum edilərək iki həftə ərzində ölkəni tərk etməyə məcbur edilmişdi.

Cavab olaraq Londonda Rusiyanın səfiri Andrey Kelin Böyük Britaniyanın Xarici İşlər Nazirliyinə çağırılıb. Rəsmi London bu addımı diplomatik missiyaya qəbuledilməz təzyiq kimi qiymətləndirərək qarşılıqlı tədbirlərin görüldüyünü bildirib.