Lukaşenko süni intellektlə bağlı boş yerə narahat olmamağa çağırıb

Belarus Prezidenti Aleksandr Lukaşenko bildirib ki, süni intellekt insanları əvəz edə bilməz və bununla bağlı boş yerə narahat olmağa ehtiyac yoxdur. "PostMedia "Belta"ya istinadən xəbər verir ki, bu barədə o, “Planar” ASC müəssisəsinə səfəri zamanı verib.

Yüksək texnologiyalarla bağlı müzakirə zamanı Lukaşenko “Planar” ASC-nin icraçı direktoru Sergey Avakovla süni intellektin inkişafı barədə fikir mübadiləsi aparıb və onun mövqeyini soruşub.

“Düşünürəm ki, bu anlayışı irəli sürənlər süni intellektin insanları əvəz edəcəyini nəzərdə tuturdular”, – deyə prezident qeyd edib.

“Xeyr, əvəz etməyəcək”, – Avakov cavab verərək əlavə edib ki, maşının onu yaradan insandan daha ağıllı olub-olmaması sualı 1950-ci illərdən bəri ritorik olaraq qalır.

Lukaşenko vurğulayıb: “Beləliklə, heç bir ‘intellekt’ bizi əvəz etməyəcək”. O əlavə edib: “Biz boş yerə narahat olmamalıyıq ki, ‘ay aman, süni intellekt gəlir, sabah bizə ehtiyac qalmayacaq’. Bütün bunları sakit qəbul etməliyik”.