Tramp Ukrayna üzrə danışıqlar fonunda “çox yaxşı hadisələr”dən danışıb

ABŞ Prezidenti Donald Tramp Ukraynadakı münaqişənin nizamlanması üzrə davam edən danışıqlarda müəyyən irəliləyiş olduğunu bəyan edib.
"PostMedia" xəbər verir ki, “Çox yaxşı hadisələr baş verir”, — deyə o, "Ağ Ev"in qarşısında jurnalistlərə bildirib, detallara varmayıb.

ABŞ Prezident administrasiyası daha əvvəl çərşənbə axşamı açıqlamışdı ki, Əbu-Dabidə keçirilən danışıqlardan sonra sülh prosesi “əla vəziyyətdədir”. Administrasiya həmin görüşü tarixi adlandırmışdı.

Şənbə günü BƏƏ-də Moskva, Vaşinqton və Kiyev nümayəndələrinin iştirakı ilə iki gün davam edən qapalı təhlükəsizlik müzakirələri başa çatıb. Tərəflər ABŞ-nin sülh planında hələ həll olunmamış məsələləri müzakirə ediblər. Rusiya işçi qrupuna Silahlı Qüvvələrin Baş Qərargahının Baş İdarəsinin rəisi, admiral İqor Kostyukov rəhbərlik edib. Növbəti raundun gələn həftə keçirilməsi mümkündür.

Xarici KİV-lərin məlumatına görə, ABŞ-nin təşəbbüsü Donbas ərazisinin tam şəkildə Moskvanın nəzarətinə verilməsini, Donbas və Krımın Rusiya ərazisi kimi rəsmi tanınmasını, Zaporojye və Xerson vilayətlərində əsasən təmas xətti üzrə vəziyyətin dondurulmasını, Ukrayna Silahlı Qüvvələrinin sayının iki dəfə azaldılmasını, həmçinin Ukraynada xarici qoşunların və Rusiyanın dərinliklərinə zərbə endirə bilən silahların yerləşdirilməsinin qadağan olunmasını nəzərdə tutur.

Əbu-Dabidəki danışıqlardan əvvəl Rusiya prezidenti Vladimir Putin ABŞ nümayəndə heyəti ilə — Donald Trampın xüsusi nümayəndəsi Stiven Uitkoffun rəhbərliyi altında — görüş keçirib.

Prezidentin köməkçisi Yuri Uşakovun sözlərinə görə, amerikalılar etiraf ediblər ki, Ankoricdə razılaşdırılmış formul üzrə ərazi məsələsi həll olunmadan uzunmüddətli nizamlanmaya ümid etmək olmaz. Moskvanın mühüm şərti kimi Ukrayna Silahlı Qüvvələrinin Donbasdan çıxması tələb olunur.