Bayden etirazlar fonunda bütün Amerikanı “ayağa qalxmağa və səsini ucaltmağa” çağırıb

ABŞ-nin keçmiş prezidenti Co Bayden ICE (İmmiqrasiya və Gömrük Mühafizəsi) ətrafında yaranmış münaqişə fonunda, Minnesota ştatı sakinlərinin nümunəsini göstərərək, “bütün Amerikanı ayağa qalxmağa və mövqeyini bildirməyə” çağırıb.

"PostMedia" xəbər verir ki, bu barədə o, X sosial şəbəkəsindəki paylaşımında yazıb.

Yanvarın əvvəlində ICE-nin reydlərindən biri zamanı agentlər Minneapolis sakini, 37 yaşlı Rene Makklin Qudu güllələyiblər. Hadisədən sonra şəhərdə kütləvi etirazlar başlayıb. ABŞ prezident administrasiyasının rəsmi şəxsləri bildiriblər ki, zabit özünü müdafiə edib.

Bayden baş verənlərin amerikalıların fundamental dəyərlərinə zidd olduğunu deyib:

“Biz küçələrdə öz vətəndaşlarını güllələyən bir millət deyilik”, — deyə o qeyd edib.

Onun sözlərinə görə, Minnesota sakinləri ədalətsizliyə qarşı çıxmaqla möhkəmlik nümayiş etdiriblər.

“Amerikanın dayandığı və inandığı dəyərləri heç bir şəxs — hətta prezident belə — məhv edə bilməz, əgər biz, bütün Amerika olaraq, ayağa qalxıb səsimizi ucaltsaq. Biz kim olduğumuzu bilirik”, — deyə Bayden çağırış edib.

O, iki amerikalının ölümü ilə bağlı ədalətli araşdırma aparılmasını tələb edib.

Qeyd edək ki, yanvarın əvvəlindəki ilk hadisədən sonra, 24 yanvarda ICE agentləri Minneapolisdə daha bir şəxsi — 37 yaşlı tibb işçisi Aleks Ceffri Prettini güllələyiblər. ABŞ Daxili Təhlükəsizlik Nazirliyi onun silahlı olduğunu iddia etsə də, yayılan videolarda Prettinin əlində silah deyil, telefon olduğu görünür. O, əməkdaşlara yaxınlaşdıqdan sonra yerə yıxılıb və ona ən azı on dəfə atəş açılıb.

Bu hadisələr fonunda ABŞ prezidenti Donald Trampın ümumi reytinqi 38%-ə düşüb ki, bu da onun hazırkı prezidentlik dövründə ən aşağı göstəricidir. Sorğu cümə–bazar günləri aparılıb və şənbə günü Minneapolisdə ikinci ABŞ vətəndaşının ICE əməkdaşları tərəfindən güllələnməsindən əvvəl və sonra toplanan cavabları əhatə edib.

Reytinqin azalması amerikalıların administrasiyanın immiqrasiya siyasətindən narazılığı ilə əlaqələndirilir.