Tramp Roma Papasını da "Sülh Şurası"na dəvət edib

ABŞ Prezidenti Donald Trampın münaqişələrin həlli üçün irəli sürdüyü "Sülh Şurası" təşəbbüsünə Roma Papası XIV Lev də dəvət alıb.

Vatikanda ikinci şəxs sayılan dövlət katibi Pyetro Parolin jurnalistlərə açıqlamasında dəvəti təsdiqləyib: "Biz bu dəvəti almışıq və hazırda nə edəcəyimizi düşünürük. Qərar verməzdən əvvəl məsələni dərindən araşdırmaq üçün vaxt lazımdır".

Məlumata görə, Tramp bu təşkilata qoşulmaq üçün ümumilikdə 60 ölkəyə, o cümlədən Azərbaycan Prezidenti İlham Əliyevə, Ermənistanın Baş naziri Nikol Paşinyana, Türkiyə Prezidenti Rəcəb Tayyib Ərdoğana və Rusiya Prezidenti Vladimir Putinə dəvət göndərib.

Qeyd olunur ki, Fransa, Norveç və Almaniya artıq bu təklifdən imtina ediblər. Azərbaycan və Macarıstan isə dəvəti qəbul edən ilk ölkələrdən biridir.