Kanadada baş nazir istefa verib

Kanadanın Kvebek əyalətinin baş naziri Fransua Leqo istefa verdiyini elan edib. Bununla da o, özünün yaratdığı partiyanın iki dəfə hökumətdə çoxluq qazandığı və əyalət siyasətində uzunmüddətli üstünlüyü ilə səciyyələnən dövrə son qoyub.

”PostMedia” xəbər verir ki, bu barədə CBC məlumat yayıb.

Leqo bildirib ki, partiyası yeni lider seçənədək vəzifəsini icra etməyə davam edəcək.

İstefa bir neçə ay davam edən siyasi qeyri-sabitlik, ictimai rəy sorğularında reytinqlərin azalması və partiyadan nazirlərin istefası fonunda baş verib.

“Görürəm ki, hazırda bir çox kvebekli ilk növbədə dəyişikliklər istəyir və bunun bir hissəsi olaraq baş nazirin dəyişməsini də arzulayır”, — deyə Leqo bildirib.

“Kvebekin Gələcəyi Koalisiyası” (CAQ) 2026-cı il 5 oktyabr tarixində planlaşdırılan seçkilərə qədər yeni lider seçmək üçün cəmi bir neçə aya sahib olacaq.

Fransua Leqo 2018-ci ildən Kvebekin baş naziri, 2011-ci ildən isə CAQ-nin lideridir.

Qanunverici orqanın dekabr tətili ərəfəsində baş nazir bir daha partiya lideri vəzifəsində qalacağını vəd etmişdi. Bu vədi o, son bir il ərzində bir neçə dəfə vermişdi — partiyadaxili gərginliyə və Milli Assambleyanın bəzi üzvlərinin onun istefasını istəməsi ilə bağlı yayılan məlumatlara baxmayaraq.