Əfqanıstanda dövlət qulluqçularına smartfonlardan istifadə qadağan edilib

Taliban hərəkatının lideri və Əfqanıstanın ali rəhbəri Hibatullah Axundzadə hərəkat üzvləri və dövlət qulluqçuları üçün smartfon istifadəsinin qadağan olunması barədə göstəriş verib.

"PostMedia" xəbər verir ki, bu barədə Əfqanıstan beynəlxalq telekanalı müvafiq sənədə istinadən məlumat yayıb.

Hüquqi əsaslandırmanın mövcud olmasına baxmayaraq, qeyd olunur ki, Axundzadənin göstərişi şifahi formada verilib. Telekanalın məlumatına görə, sənəddə yeni qanunu pozan şəxslər “cinayətkar” kimi qiymətləndirilir və onların hərbi tribunal qarşısına çıxarıla biləcəyi barədə xəbərdarlıq yer alır.

Kanalın məlumatına əsasən, göstəriş Əfqanıstanın səkkiz bölgəsində fəaliyyət göstərən hərbi məhkəmələrin rəhbərlərinə çatdırılıb. Qərarla polis rəisləri və kəşfiyyat qurumlarının nümayəndələri də tanış edilib. Mənbənin iddiasına görə, məsul şəxslərə qadağanın icrasını təmin etmək və onun həyata keçirilməsi barədə mütəmadi olaraq hərəkat rəhbərliyinə hesabat vermək tapşırılıb.

Yeni qaydalara əməl olunmasına nəzarət etmək üçün xüsusi reyestr hazırlanıb. Reyestrə əməkdaşların məlumatları, o cümlədən vəzifələri, xidmət yeri, mobil operatoru və telefon nömrəsi daxil edilir. Telekanalın məlumatına görə, onlar daimi nəzarət altında saxlanılacaqlar.

"KabulNow" xəbər portalı bildirir ki, göstəriş verildikdən sonra Taliban hərəkat üzvlərindən birinin öz smartfonunu məhv etdiyi görüntüləri yayıb. Nəşr əlavə edir ki, bu addım təhlükəsizlik səbəbilə “daxili intizamın gücləndirilməsi” və informasiyaya nəzarətin artırılması məqsədi daşıyır.

Telekanal bildirir ki, bu göstərişdən üç gün əvvəl Talibanın Təhsil Nazirliyinin qərarı ilə tələbələrə və şagirdlərə məktəblərə və dini seminariyalara smartfon gətirmək də qadağan edilmişdi. Qurumun rəhbəri mobil telefonları “müsəlmanların üç əsas düşmənindən biri” adlandırmışdı.