Yaponiya varislik böhranını həll etmək üçün qanun dəyişiklikləri təklif edir

Yaponiya parlamentinin hər iki palatasının spikerləri imperator ailəsi ilə bağlı qanuna dəyişiklik təkliflərini bütün fraksiyaların müzakirəsinə təqdim ediblər. Məqsəd taxt-tac varisliyi ilə bağlı böhranı həll etməkdir.

"PostMedia" xəbər verir ki, bu barədə "Kyodo News" məlumat yayıb.

Hazırda imperator Naruhitonun cəmi üç varisi var: onun kiçik qardaşı və vəliəhd şahzadə Fumihito, 19 yaşlı qardaşı oğlu Hisahito və 90 yaşlı əmi Hitachi. Bu səbəbdən son illərdə imperator taxtının davamlı varisliyi ilə bağlı narahatlıqlar artıb.

Müzakirə edilən iki əsas təklif 1947-ci il qanununa dəyişiklikləri nəzərdə tutur. Həmin qanuna görə, imperator taxtı yalnız kişi xətti ilə ötürülə bilər. Birinci təklifə əsasən, qadınlara və şahzadə qızlara adi vətəndaşlarla evləndikdən sonra da imperator ailəsi statusunu saxlamaq imkanı verilməsi nəzərdə tutulur. İkinci təklif isə 1947-ci ildə bu statusdan məhrum edilmiş imperator ailəsinin 11 yan qolundan olan kişi üzvlərin yenidən ailəyə qəbul edilməsini nəzərdə tutur.

Gözlənilir ki, bu təkliflər daha sonra baş nazir Sanae Takaichiyə təqdim olunacaq. Bundan sonra hökumət müvafiq qanun layihəsi hazırlayacaq və layihənin parlamentin cari sessiyası bitməzdən, yəni iyulun 17-dək qəbul olunması mümkün hesab edilir.