"Ağ Ev" İranın "tamamilə fərqli" sülh planı təqdim etdiyini iddia edir

İran nümayəndələri mümkün razılaşma üzrə danışıqlar üçün əsas ola biləcək yenilənmiş planı ABŞ tərəfinə təqdim ediblər.

"PostMedia" xəbər verir ki, bu barədə "Ağ Ev"in mətbuat katibi Karolayn Levitt brifinqdə bildirib.

Onun sözlərinə görə, İran ilkin olaraq 10 maddədən ibarət plan təqdim edib, lakin Donald Tramp və onun danışıqlar komandası bu təklifi tamamilə qəbuledilməz hesab edib.

“İranlılar əvvəlcə 10 maddədən ibarət plan təqdim etmişdilər. Bu plan ciddi deyildi, qəbuledilməz idi və tam şəkildə rədd edildi. Prezident Tramp və onun komandası onu sözün əsl mənasında zibil qutusuna atdı”, – deyə Levitt bildirib.

Onun sözlərinə görə, ABŞ prezidentinin ultimatumundan və ABŞ silahlı qüvvələrinin zərbələrinin davam etməsindən sonra Tehran “reallığı qəbul edib” və yeni, daha qısa və daha məntiqli plan təqdim edib.

Levitt qeyd edib ki, Tramp və onun komandası bu yenilənmiş planı danışıqlar üçün “işçi əsas” kimi qəbul ediblər və onu ABŞ tərəfinin 15 maddədən ibarət öz təklifi ilə uyğunlaşdırmaq niyyətindədirlər.

"Ağ Ev" həmçinin vurğulayıb ki, Vaşinqton İranla danışıqları yalnız Hörmüz boğazı beynəlxalq gəmiçilik üçün açıq qaldığı halda aparmağa hazırdır.

“Prezident yalnız ABŞ-nin maraqlarına tam uyğun olan razılaşma üzərində danışıqlar aparacaq”, – deyə Levitt bildirib. Onun sözlərinə görə, danışıqlar qrupu iki həftə ərzində bu istiqamətdə işləyəcək və bu müddətdə boğazın heç bir məhdudiyyət və gecikmə olmadan açıq qalması vacibdir.