Yeniyetmələrin təxminən 20%-i Instagram-da istəmədiyi seksual məzmun gördüyünü bildirib

13–15 yaş arası istifadəçilərin təxminən beşdə biri (20%) "Meta" şirkətinə "Instagram" platformasında istəmədikləri çılpaq və ya seksual xarakterli şəkillər gördüklərini deyib.

"PostMedia" "Reuters"ə istinadən xəbər verir ki, bu məlumat Kaliforniyada aparılan federal məhkəmə işi çərçivəsində açıqlanan sənəddə yer alıb və "Instagram"ın rəhbəri Adam Mosserinin 2025-ci ilin martında verdiyi ifadədən parçaları əhatə edir.

Mosseri bildirib ki, şirkət adətən bu cür sorğuların nəticələrini dərc etmir və əlavə edib ki, öz-özünə bildirişə əsaslanan araşdırmalar “xüsusilə problemli” sayılır. "Meta"nın sözçüsü Endi Stoun isə sorğunun 2021-ci ildə keçirildiyini qeyd edib.

"Facebook" və "Instagram" platformalarına sahib olan "Meta" bir çox dünya liderləri tərəfindən gənclərə zərərli məhsullar yaratmaqda ittiham olunur. ABŞ-nin federal və ştat məhkəmələrində minlərlə iddia şirkəti asılılıq yaradan məhsullar hazırlamaqda və yeniyetmələr arasında psixi sağlamlıq böhranına səbəb olmaqda günahlandırır.

Stoun vurğulayıb ki, seksual xarakterli açıq məzmunla bağlı statistika birbaşa paylaşımların yoxlanılmasına deyil, istifadəçilərin "Instagram"da yaşadıqları təcrübə barədə sorğulara əsaslanır.

2025-ci ilin sonunda "Meta" yeniyetmələr üçün yeni siyasət tətbiq edib. Bu qaydalara əsasən, tibbi və tədris məqsədli materiallar istisna olmaqla, çılpaqlıq və açıq seksual fəaliyyət əks etdirən, o cümlədən süni intellektlə yaradılmış şəkil və videoların silinməsi tələb olunur.

“Əldə etdiyimiz irəliləyişlə qürur duyuruq və daim təkmilləşmə üzərində çalışırıq”, – deyə Stoun bildirib.

Bundan əlavə, 13–15 yaş arası istifadəçilərin 8%-i "Instagram"da özünə zərər verən və ya bunu edəcəyi ilə hədələyən şəxslər gördüklərini də qeyd edib.

Mosseri bildirib ki, seksual xarakterli məzmunun böyük hissəsi istifadəçilər arasında şəxsi mesajlar vasitəsilə yayılır və əlavə edib ki, bu cür hallarda "Meta" istifadəçi məxfiliyini nəzərə almağa məcburdur.

“Bir çox insan mesajlarının oxunmasını istəmir”, – deyə o vurğulayıb.