"iPhone"un dizayneri "Ferrari" üçün yeni elektrikli avtomobil dizayn edib

"Ferrari" rəsmi olaraq ilk tam elektrikli avtomobilinin adını və interyerini təqdim edib.

"PostMedia" "Autocar"a istinadən xəbər verir ki, model "Ferrari Luce" adlanacaq (italyanca “işıq” mənasını verir və elektrik enerjisinə də işarə edir).

Bu, italyan brendi üçün tarixi bir mərhələdir: 76 illik tarixində ilk dəfə olaraq ənənəvi daxili yanma mühərriki olmayan model yaradılır. Şirkət hələlik bütün avtomobili deyil, sürücü və sərnişin salonunu nümayiş etdirib. Burada Ferrari-nin klassik ənənələrinin yeni dizayn yanaşması ilə sintezi açıq şəkildə görünür.

"Luce" modelinin əsas fərqləndirici cəhəti interyeridir. O, "Apple"ın keçmiş baş dizayneri ser Conni Ayv və Mark Nyuson tərəfindən təsis edilmiş britaniyalı "LoveFrom" studiyası ilə birgə hazırlanıb. Ayv "iPhone", "iPad" və "Apple"ın digər məşhur məhsullarının yaradıcılarından biri kimi tanınır. Bu interyerdə onun təsiri smartfon estetikasında deyil, fiziki idarəetmə elementləri ilə rəqəmsal ekranların innovativ sintezində özünü göstərir.

Müasir avtomobillərdə geniş ekranların üstünlük təşkil etdiyi “rəqəmsal kabinə” konsepsiyası əvəzinə Ferrari toxunma düymələri, qollar və açarların kombinasiyasını seçib. Bu elementlər sürücünün gözünü yoldan ayırmadan asanlıqla idarə olunur. Ayv və komandası hesab edir ki, bu yanaşma sürücülüyü əksər elektrik avtomobilləri ilə müqayisədə daha təhlükəsiz və intuitiv edir. Salonda anodlaşdırılmış alüminium, "Corning Gorilla Glass" şüşə və yüksək keyfiyyətli dəri materiallardan istifadə olunub.

Mərkəzdə "iPad"i xatırladan “üzən” 10 düymlük sensor ekran yerləşir. Fiziki idarəetmə düymələri onun ətrafında elə qurulub ki, sürücü mürəkkəb menyulara girmədən hansı düymənin nə iş gördüyünü dərhal anlayır. Alətlər panelində isə OLED ekranlarla real oxlardan istifadə olunaraq rəqəmsal və analoq göstəricilərin hibrid kombinasiyası yaradılıb.

"Ferrari" sükanı da xüsusi diqqətlə dizayn edib: üçşüalı, incə formaya malik, alüminium elementlər və fiziki düymələrlə təchiz olunmuş bu sükan klassik idman avtomobillərinin ruhunu qorumaqla yanaşı, müasir elektrik avtomobili xüsusiyyətlərini də özündə birləşdirir.

Texniki göstəricilərə gəlincə, "Luce" dörd qapılı "super-GT" olacaq, təxminən 1000 at gücünə malik dörd elektrik mühərriki ilə təchiz ediləcək və təxminən 530 km yürüş məsafəsi təqdim edəcək. Avtomobilin tam təqdimatı, kuzovu ilə birlikdə, 2026-cı ilin may ayında planlaşdırılır.