Tramp ABŞ-ın ən vacib dəmir yolu vağzalını və hava limanını öz adının verilməsini istəyib – təklif rədd edilib

ABŞ Prezidenti Donald Tramp Nyu-Yorkun əsas nəqliyyat qovşaqlarından biri olan Penn Station dəmir yolu vağzalının və Vaşinqtondakı Dulles beynəlxalq hava limanının öz adının verilməsi təklifi ilə çıxış edib.

"PostMedia" xəbər verir ki, bu barədə CNN məlumat yayıb.

Mənbələrin bildirdiyinə görə, Tramp ötən ay Senatda azlıq lideri Çak Şumerə müraciət edərək ümumi dəyəri 16 milyard dolları aşan "Gateway" layihəsinin maliyyələşdirilməsinin bərpasını təklif edib.

Bu layihə Hudzon çayının altından yeni dəmir yolu tunelinin inşasını, Nyu-York və Nyu-Cersi ştatlarını birləşdirməyi, eləcə də ABŞ-ın ən yüklənmiş nəqliyyat arteriyalarından birinin infrastrukturunun modernləşdirilməsini nəzərdə tutur.

Lakin Tramp maliyyələşmənin davam etdirilməsi üçün şərt kimi Nyu-Yorkdakı dəmir yolu vağzalının və Vaşinqtondakı hava limanının onun şərəfinə adlandırılmasını irəli sürüb. Şumer bu təklifi rədd edərək bildirib ki, belə bir qərar qəbul etmək üçün onun səlahiyyəti yoxdur։

Qeyd edək ki, Gateway layihəsinin maliyyəsinin dondurulması artıq hüquqi mübahisəyə səbəb olub. Nyu-York və Nyu-Cersi ştatları Tramp administrasiyasını məhkəməyə verərək, maliyyənin dayandırılmasının qanunsuz olduğunu iddia ediblər.

CNN-in məlumatına görə, ad dəyişikliyi təşəbbüsü qanunvericilər və ictimaiyyət arasında geniş rezonans doğurub, lakin Ağ Ev bu məsələ ilə bağlı rəsmi açıqlama verməyib.

ABŞ-da fəaliyyətdə olan siyasətçilərin adlarının iri ictimai obyektlərə verilməsi nadir praktika sayılır və Konqresdə, eləcə də yerli idarəetmə orqanlarında geniş dəstək tələb edir. Skeptiklər hesab edirlər ki, hətta bəzi qanunvericilərin dəstəyi ilə belə bu təşəbbüsün qəbul olunması üçün kifayət qədər səs toplaması çətin görünür.