Nəşriyyatlar "Ozon" və "Wildberries" anbarlarına zərbələr nəticəsində 6 milyard rubl dəyərində 15 milyon kitab itirib

Rusiya nəşriyyatları Ukraynaya məxsus pilotsuz uçuş aparatlarının "Ozon" və "Wildberries" marketpleyslərinin anbarlarına endirdiyi zərbələr nəticəsində 6 milyard rubl (119 milyon manat) dəyərində kitab itirib.

"PostMedia" xəbər verir ki, "Kom­mersant"ın yazdığına görə, bunu "Rusiya Kitab Bazarı-2026" konfransında Rusiya Rəqəmsal İnkişaf Nazirliyinin dövri mətbuat və kitab sənayesinə dövlət dəstəyi departamentinin direktoru Vladimir Qriqoryev açıqlayıb.

Onun sözlərinə görə, marketpleyslərin paylama mərkəzlərində ümumilikdə 15 milyon kitab yanıb. "Eksmo" nəşriyyatının baş direktoru Yevgeni Kapyev isə məhv olan kitabların sayının 20 milyona çata biləcəyini istisna etməyib.

Rəqəmsal İnkişaf Nazirliyinin nümayəndəsi kitab sənayesinə dəstək çərçivəsində 1 il müddətinə 5% güzəştli ƏDV tətbiqinin mümkünlüyünün müzakirə edildiyini bildirib. "Eksmo" nəşriyyatında çap məhsullarına tətbiq olunan ƏDV-nin azaldılmasını, məhv edilmiş məhsullara görə ödənilmiş verginin bərpasının qadağan edilməsini, həmçinin həmin məhsulların tam dəyərinin xərclərə daxil edilməsinə icazə verilməsini təklif edirlər.

Nəşriyyat şirkəti dövriyyə vəsaitlərinin bərpası üçün güzəştli kreditlərin verilməsini də zəruri hesab edir. "Rosmen" nəşriyyatının baş direktoru Boris Kuznetsov bildirib ki, hazırda dəstək məsələsində ən azı müəyyən bir nümunə yaradılmalıdır. Onun sözlərinə görə, 5%-lik güzəştli ƏDV, əlbəttə, sektoru xilas etməyəcək, lakin ən azı müəyyən dəstək olacaq.

Ukrayna Silahlı Qüvvələri iyulun 18-dən Rusiyanın ən böyük marketpleyslərindən biri olan "Wildberries"in anbarlarına zərbələr endirməyə başlayıb. Ötən müddət ərzində 16 regionda 23 anbarın hücuma məruz qaldığı bildirilir.

Ukrayna Müdafiə Nazirliyi açıqlamasında marketpleysin 10 ən böyük logistika mərkəzindən 7-sinin tamamilə sıradan çıxarıldığını bildirib. Onların arasında Moskva vilayətinin Koledino kəndində yerləşən və sahəsi 250 min kvadratmetr olan ən böyük anbar da var.

Bundan başqa, avqustun 22-dən etibarən Ukrayna ordusunun hücumları Rusiyanın ikinci ən böyük marketpleysi olan "Ozon"un anbarlarına da yayılıb. Ümumilikdə şirkətin ən azı 7 obyektinin hücuma məruz qaldığı bildirilir.

"Data Insight" analitiklərinin hesablamalarına görə, yalnız "Wildberries"in infrastruktur itkilərindən yaranan birbaşa zərəri avqustun ortalarına 147-223 milyard rubl təşkil edib. Bununla yanaşı, marketpleysin satıcıları 445-507 milyard rubl dəyərində məhsul itirib.

Beləliklə, ümumi zərərin 800 milyard rubla çata biləcəyi bildirilir. "Ozon" isə infrastrukturuna hücumlar nəticəsində 30-62,5 milyard rubl itirə bilər. Şirkətin satıcılarının itkilərinin isə 88,5-107 milyard rubl olduğu təxmin edilir.

Ukrayna Prezidenti Vladimir Zelenski marketpleyslərin anbarlarına zərbələri onların Rusiya ordusunun təminatında istifadə olunması ilə izah edib.

Rusiya Prezidenti Vladimir Putin isə hücumları şərh edərkən onların Rusiyaya "həyati əhəmiyyətli zərər" vurmadığını bildirib.

Eyni zamanda, Putin dron hücumlarından obyektlərin müdafiəsini təmin etməyən sahiblərin müəssisə və obyektlərinin müvəqqəti dövlət idarəçiliyinə verilməsinə imkan yaradan fərman imzalayıb.