Putinin köməkçisi Ukrayna tərəfi ilə əlavə iki saatlıq danışıqlar aparıb

Cenevrədə üçtərəfli danışıqların rəsmi başa çatmasından sonra Rusiya nümayəndə heyətinin rəhbəri, prezidentin köməkçisi Vladimir Medinski görüşlərin keçirildiyi otelə geri qayıdaraq Ukrayna nümayəndə heyətinin rəhbəri Rustem Umerov və ukraynalı danışıqlarçı David Araxamiya ilə əlavə danışıqlar aparıb.

"PostMedia" xəbər verir ki, görüşün iki saat davam etdiyi barədə BBC-yə Rustem Umerovun mətbuat katibi Diana Davityan bildirib.

Daha əvvəl oteldən çıxarkən Medinski həqiqətən “Ukrayna tərəfi ilə” görüş keçirdiyini təsdiqləmiş, lakin konkret olaraq kimlərlə danışdığını açıqlamamışdı.

Məlumata görə, Umerov və Araxamiya danışıqlar qrupunun siyasi alt-komandasının üzvləri olduqları üçün əlavə görüşdə əsas müzakirə mövzusu siyasi məsələlər olub.

Ukrayna prezidenti Volodimir Zelenskinin sözlərinə görə, məhz bu siyasi məsələlər danışıqlar prosesində ən problemli və çətin məqamlar olaraq qalır.

Mənbələr bildirir ki, tərəflər münaqişənin tənzimlənməsi ilə bağlı mövqelərin yaxınlaşdırılması və mümkün kompromislərin müzakirəsinə xüsusi diqqət ayırıblar.

Danışıqların nəticələri və əldə olunan razılaşmalar barədə hələlik rəsmi açıqlama verilməyib.