Tbilisidə Tramp qülləsinin tikintisi qismən İvanişvilinin oğluna məxsus torpaq sahəsində planlaşdırılır

Tbilisidə Tramp qülləsinin ABŞ sanksiyaları altında olan Bidzina İvanişvilinin oğluna qismən məxsus torpaq sahəsində tikilməsi planlaşdırılır,

"PostMedia" Xəbər verir Kİ, bu barədə "The Guardian" nəşri məlumat yayıb.

Bu göydələn layihəsi yerli konsorsium və "Trump Organization" şirkətinin birgə təşəbbüsüdür, hazırda ABŞ prezidentinin oğulları - Donald Tramp Jr. və Erik Tramp tərəfindən idarə olunur. Bina hazırda rəsmi qeydiyyatda olan sahibi “Kartu” beynəlxalq xeyriyyə fondu olan bir torpaq sahəsində yerləşəcək.

Rəsmi reyestrlərə görə, “Kartu” fondu tamamilə "Cartu Group" səhmdar cəmiyyətinə məxsusdur. Öz növbəsində, bu SC-nin səhmlərinin 35%-i milyarder və siyasətçi, Gürcüstanın hakim partiyasının fəxri sədri Bidzina İvanişvilinin böyük oğlu Uta İvanişviliyə məxsusdur.

Gürcüstanın de-fakto lideri hesab edilən Bidzina İvanişvili 2024-cü ildə Bayden administrasiyası tərəfindən “Rusiya Federasiyasının xeyrinə Gürcüstanın demokratik və avroatlantik gələcəyini zəiflətmək” ittihamı ilə ABŞ sanksiya siyahısına daxil edilib.

Sanksiyalara məruz qalmayan Uta İvanişvili 2024-cü ilə qədər "Cartu Group" SC-nin səhmlərinin 100%-nə sahib idi. Lakin atası ABŞ iqtisadi məhdudiyyətlərinə düşdükdən sonra o, payını 35%-ə endirib. "Cartu Group"un qalan 65%-lik səhmdarlarının kimliyi bu günə qədər müəyyən edilməyib, çünki qanuna görə fiziki şəxslərin 5%-dən az payı anonim qala bilər.

Mövcud sanksiya rejimi çərçivəsində ABŞ vətəndaşlarına Bidzina İvanişvili ilə xüsusi icazə olmadan biznes aparmaq, ödəniş etmək və ya xidmət göstərmək qadağandır, lakin onun nəzarət etdiyi kommersiya şirkətlərinə aid istisnalar mövcuddur.

"Trump Organization" və İvanişvili ailəsi arasındakı əlaqələr mümkün maraq toqquşması ilə bağlı yeni narahatlıqlar yarada bilər. Söhbət ABŞ prezidentinin adının yaşayış və kurort layihələrini həyata keçirən tikinti şirkətlərinə satılması praktikasından gedir.

"Trump Organization"un oxşar françayzinq razılaşmalarına Oman da daxildir - burada hökumətə məxsus torpaqda lüks otel və qolf kompleksi tikilir. Bu layihə, daha üç layihə ilə birlikdə, Səudiyyə Ərəbistanının hökumətlə sıx əlaqələri olan "Dar Al Arkan" tikinti şirkətinin törəmə qurumu ilə əməkdaşlıqda həyata keçirilir; bu barədə ötən il "New York Times" xəbər verib. Ağ Ev isə bildirib ki, “nə prezident, nə də onun ailəsi heç vaxt maraq toqquşması vəziyyətlərinə cəlb olunmayıb və olunmayacaq”.

"Trump Organization"un mətbuat açıqlamasında Tbilisidə 70 mərtəbəli göydələn layihəsini elan edən Erik Tramp bu beynəlxalq tikinti şirkətinin icraçı vitse-prezidenti olaraq bildirib ki, korporasiya “bu dünya səviyyəli standartı Gürcüstana gətirdiyinə görə qürur duyur və bu layihə çərçivəsində belə hörmətli və peşəkar tikintiçilərlə əməkdaşlıqdan xüsusilə məmnundur”.

Gürcüstanda ən hündür binanın tikintisi üçün "Trump Organization" ilə əməkdaşlığa "Archi Group2, "Biograpi Living", "Blox Group" və "Finvest Georgia" daxil olmaqla dörd gürcü şirkəti, həmçinin Trampın uzunmüddətli tərəfdaşı olan ABŞ-nin Sapir Organization şirkəti qoşulub. Bu şirkətlərin və ya onların rəhbərlərinin heç biri sanksiyalara məruz qalmayıb.