Sintiya Erivo Ariana Qrande ilə dostluğuna olan reaksiyadan danışıb

Aktrisa və müğənni Sintiya Erivo “Wicked” filminin və onun davamının təbliğat turu zamanı Ariana Qrande ilə dostluğuna göstərilən diqqətə münasibət bildirib.

"PostMedia" xəbər verir ki, Erivo bu fikirləri "The Guardian" nəşrinə “Prima Facie” məhkəmə dramı ilə bağlı müsahibəsində səsləndirib.

Con M. Çunun “Wicked” ekran versiyasından sonra Erivonun şöhrəti daha da artıb. Filmdə o, Elfaba, Qrande isə Qlinda obrazını canlandırır. 2024-cü ildə çəkilən filmin təbliğat turundan çoxlu məqam sosial şəbəkələrdə geniş yayılıb, iki ulduz arasındakı yaxın münasibət isə müzakirə mövzusuna çevrilib.

“Divanlarında oturub psixoloqa çevrilən çoxlu insanın olması maraqlı idi”, — deyə Erivo bildirib. — “Orada qəribə bir... nə deyərlər... bezginlik vardı ki, iki qadın həqiqətən dost ola bilər. Niyə dostdurlar? Niyə bir-birinə bağlıdırlar? Yəqin ki, onlarda nəsə problem var”.

Yayılan kadrların çoxunda ulduzların qucaqlaşdığı, ağladığı və “holding space” adlandırılan jestlə bir-birinin şəhadət barmağını sıxdığı görünür. Erivo bu reaksiyaya sual verib: “Niyə emosiya göstərirlər? Necə cürət edirlər ki, ağlasınlar? Gülsünlər? Necə cürət edirlər ki, emosional və canlı olsunlar?”

Aktrisa vəziyyətin iki tərəfi iti qılınca bənzədiyini də deyib: “Çünki gözlərimiz ölü olsaydı və heç bir emosiya göstərməsəydik, onda da bu barədə deyiləcək başqa söz tapılacaqdı. Kaş kimsə çıxıb deyəydi ki, düzgün emosiya balansı budur, bunu göstərmək olmaz, onu göstərmək olmaz, yalnız bu qədər göstərmək olar”.

Ən çox yadda qalan anlardan biri Sinqapurda qırmızı xalça mərasimində baş verib. Bir kişi Qrandeni tutandan sonra Erivo müdaxilə edib. O, həmin anı qorxulu adlandırıb və öz reaksiyasını “Bu adamı dərhal bizdən uzaqlaşdırın” sözləri ilə izah edib.

İnternet istifadəçiləri sonradan Erivonu Qrandenin “cangüdəni” kimi təqdim etməyə başlayıb. Aktrisa bu təsvirdən narahat olduğunu bildirib və reaksiyanın qadın nifrətinə, eləcə də qara qadınlara yönəlmiş ayrı-seçkiliyə (misogynoir) əsaslandığını deyib.

“Mən düşündüm ki, görkəmimə görə mənimlə bu cür danışa bilərsiniz? Bu, hər hansı dost üçün edəcəyim və dostun da mənim üçün edəcəyinə ümid etdiyim insani bir hərəkət idi. Amma deyəsən, mən cangüdən olmalıyam”, — deyə Erivo bildirib.