Rusiyada icbari tibbi sığortası olmayan miqrantlar deportasiya ediləcək

Rusiya Liberal-Demokrat Partiyası (LDPR) Rusiyada yaşayan miqrantların mütləq tibbi sığorta polisinin olmasını tələb edən qanun layihəsi təqdim edib.

"PostMedia" Rusiya KİV-lərinə istinadən xəbər verir ki, Partiya rəhbəri Leonid Slutskı sığortası olmayan miqrantlar deportasiya ediləcəyini bildirib.

Slutskının açıqlamasına görə, qanun layihəsi Rusiyada müvəqqəti və ya daimi yaşayan miqrantları könüllü və ya məcburi tibbi sığorta (DMS və ya OMS) ilə təmin etməyə məcbur edəcək. Əgər miqrantın belə sənədi yoxdursa, deportasiya mexanizmi işə düşəcək.

Layihənin izahında qeyd olunur ki, bu tədbir Rusiya səhiyyə sisteminin dayanıqlığını qorumağa və xarici vətəndaşların tibbi xidmət xərclərini azaltmağa kömək edəcək. Məsələn, son beş ildə Rusiyanın xarici vətəndaşların müalicəsinə 60 milyard rubl xərclədiyi vurğulanır. Slutskı bildirib ki, miqrantların sayı artmaqda davam edir. Belə ki, yalnız ötən il Rusiyaya 6 milyondan çox insan gəlib.

Əvvəlcə Rusiya Prezidenti Vladimir Putin də federal və regional səviyyədə miqrasiya problemlərini görməzdən gəlməmək lazım olduğunu bildirib və miqrantlar üçün patent sisteminin ləğvini istisna etməyib.