Tramp və Mamdani Nyu-Yorkda BMT Baş Assambleyasından əvvəl görüşəcək

ABŞ Prezidenti Donald Tramp sentyabrın 21-də, bazar ertəsi, Nyu-Yorkun meri Zoran Mamdani ilə görüşəcək. Görüş merin rəsmi iqamətgahı olan "Gracie Mansion"da keçiriləcək.

"PostMedia" xəbər verir ki, bu barədə "NBC News" Mamdaninin ofisinə istinadən məlumat yayıb.

Meriyanın açıqlamasına görə, tərəflər "Nyu-York və Nyu-York sakinlərinə aid məsələləri" müzakirə edəcəklər. Qarşıdakı görüşün digər detalları hələ açıqlanmayıb.

Tramp BMT Baş Assambleyası ilə bağlı tədbirlərdə iştirak etmək üçün Nyu-Yorka gələcək. ABŞ Prezidenti çərşənbə axşamı çıxış edəcək və xarici ölkələrin liderləri ilə görüşəcək.

Bu, Tramp və Mamdaninin ən azı üçüncü ictimai görüşü olacaq. Onlar ilk dəfə 2025-ci ilin noyabrında, Mamdani Nyu-Yorkun seçilmiş meri olduğu vaxt görüşüblər. Daha sonra bu ilin fevralında Ağ Evdə görüşüblər.

Onların münasibətləri birmənalı olmayıb. İlk görüşdən əvvəl Tramp Mamdanini "kommunist dəli" adlandırmışdı. Lakin Oval kabinetdəki görüşdən sonra jurnalistlərə onu dəstəkləyəcəyini və "çox rasional insan" olduğunu demişdi.

Mamdani isə seçki kampaniyası zamanı Trampı "diktator" və "faşist" adlandırmışdı. Prezidentlə ilk görüşündən sonra bu ifadələrindən geri çəkilməyib, lakin onların söhbətinin birbaşa xarakter daşıdığını və tərəflərə fikir ayrılıqlarını açıq şəkildə müzakirə etməyə imkan verdiyini bildirib.

Mamdani aprel ayında Tramp ilə Nyu-Yorkda həyatın bahalaşması məsələsində ortaq maraqlarının olduğunu demişdi. Bununla yanaşı, mer prezidentin bir sıra qərarlarını tənqid edib. O, xüsusilə ABŞ ilə İran arasında müharibəyə qarşı çıxaraq hərbi münaqişənin şəhər sakinləri üzərindəki təzyiqi artırdığını bildirib.

Tramp da öz növbəsində Mamdaninin təşəbbüslərini açıq şəkildə tənqid edib. O, xüsusilə merin Nyu-Yorkda əlavə, əsas yaşayış yeri olmayan mənzillərə sahib şəxslər üçün təklif etdiyi verginin əleyhinə çıxıb.

Qarşıdakı görüşdə tərəflərin birbaşa Nyu-York və şəhər sakinlərinə aid məsələlərə diqqət yetirməsi gözlənilir.