Avropa qış mövsümünün başlanğıcından qaz anbarlarından rekord həcmdə qaz çəkməyə davam edir.
Lakin noyabrın ortalarında bu tempin bir qədər azaldığı bildirilir.
"PostMedia" xəbər verir ki, bu barədə TASS məlumat yayıb.
"Gas Infrastructure Europe" (GIE) məlumatlarında göstərilir ki, Avropa oktyabrın 28-dən etibarən qış mövsümü ərzində anbarlardan təxminən 7 milyard kubmetr qaz çıxarıb. Qeyd olunur ki, qaz anbarlarının oktyabr ayında zirvə doluluğu 74,96 % təşkil edib, zirvədən sonra üç həftədən çox vaxt keçib və ümumi çıxarış son beş ilin orta göstəricisindən 1,5 dəfə çoxdur.
Noyabrın 1-dən 18-dək anbarlardan çıxarış 6 milyard kubmetri ötsə də, bu göstərici 2016-cı ilin eyni dövrünün nəticəsindən aşağıdır. Mütəxəssislərin fikrincə, bunun səbəbi noyabrın ortalarında region üzrə nisbətən isti havadır. Eyni zamanda, növbəti həftənin əvvəlində Mərkəzi Avropada həqiqi qış temperaturlarının müşahidə oluna biləcəyi gözlənilir.
Çıxarışın tempinin azalması və eyni zamanda vurulan qazın artması Avropa anbarlarının xalis çıxarış (çıxarış ilə vurulan həcm arasındakı fərq) göstəricisinə də təsir edib. Qış mövsümünün əvvəlindən 22 gün ərzində xalis çıxarış 5,8 milyard kubmetr təşkil edib. Bu, son beş illik orta göstəricidən hələ də 1,7 dəfə yüksəkdir, lakin 2024-2025-ci il mövsümünün rekordundan geri qalır. Avropa ölkələri yay aylarında vurulan 51,2 milyard kubmetr qazın 11 %-ni artıq istifadə ediblər.
Noyabrın 18-nə olan məlumata görə, Avropa anbarları 69,83 % dolu olub. Bu, son beş ilin orta göstəricisindən 17,87 faiz bənd aşağıdır və ötən ilin eyni tarixindəki 81,2 %-dən də geridədir. TASS qeyd edir ki, bu, 2011-ci ildən müşahidələrin başladığı vaxtdan bu tarix üçün ən aşağı göstəricidir. Avropa İttifaqının anbarlarında təxminən 76,5 milyard kubmetr qaz var ki, bu da ötən ilə nisbətən 13,2 milyard kubmetr azdır və 2013-cü ildən bəri ən aşağı səviyyədir.
Avropa Komissiyasının tələblərinə görə, Aİ ölkələri hər il oktyabrın 1-dən dekabrın 1-dək anbarlarını 90 % dolduraraq saxlamalıdır. Anbarların doldurulmasında çətinlik yarandıqda 10 %-lik çevikliyə icazə verilir. TASS-ın hesablamasına görə, 2026-2027-ci il qış mövsümünün əvvəlinə normanı təmin etmək üçün ən azı 68 milyard kubmetr xalis vurulma tələb olunurdu. Avropa Komissiyası isə çox isti qış ümidi ilə bu göstəricini 80 %-ə endirməyə hazır olsa da, Avropa bu səviyyəyə də çatmayıb.