“Bank Respublika”nın “AccessBank”ı almasına “Paşa Bank”dan reaksiya

Bazardakı bu dəyişikliklər rəqabət mühitini yeniləsə də, bankın strateji üstünlüklərinə mənfi təsir göstərmir.

Bunu “PostMedia”nın sualına cavabında “PAŞA Bank”ın İdarə Heyəti sədrinin müavini Bəhruz Nağıyev deyib.

B.Nağıyevin sözlərinə görə, bank sektorunda konsolidasiya prosesləri bazarın sağlamlaşması və daha iri oyunçuların formalaşması baxımından təbii bir mərhələdir:

“Lakin “Paşa Bank” illərdir ki, korporativ bankçılıq sektorunda kapital həcmi, geniş mütəxəssis komandası və təqdim etdiyi iri həcmli sindikatlaşdırılmış kreditlər üzrə şəksiz liderdir. Yeni birləşmələr rəqabəti artırsa da, bizim korporativ tərəfdaşlarımıza təklif etdiyimiz miqyas, maliyyə dayanıqlılığı və kompleks xidmət səviyyəsi mövqeyimizi möhkəm saxlayır".